2015-11-09 13:41

ხმაურით მიმდინარეობს იუსტიციის უმაღლესი საბჭოს სხდომა. სხდომაზე ,,რუსთავი 2 -ის“საქმეზე მოსამართლე თამაზ ურთმელიძის მიერ ჩატარებულ სასამართლო პროცესებს განიხილავენ.

სხდომას თავად ურთმელიძე არ ესწრება, როგორც მან განმარტა, მისი დასწრება ეჭვქვეშ დააყენებდა სასამართლოს რეპუტაციას.

ურთმელიძის ჩატარებული სასამართლო პროცესების შესახებ მსჯელობენ საბჭოს არამოსამართლე წევრები. ერთ-ერთი მათგანის, ევა გოცირიძის განცხადებით, თამაზ ურთმელიძე საზოგადოებამ, ფაქტობრივად, ანათემას გადასცა, რის გამოც, მას უკვე ეცოდება სააპელაციო სასამართლოს ის მოსამართლეები, ვისაც მოუწევს რუსთავი 2-ის საქმის განხილვა. მისი თქმით, ეს მოსამართლეები მორალური წნეხის ქვეშ აღმოჩნდებიან.

ურთმელიძის დაცვისაკენ მოუწოდებს საბჭოს ,,მოსამართლეთა ერთობის" თავმჯდომარე, მაია ბაქრაძე. ბაქრაძემ აღნიშნა, რომ ადვოკატები ერთმანეთის დასაცავად ,,ფეხზე დგანან", ასევე მჭიდრო სოლიდარობაა მედიის წარმომადგენლების მხრიდან ერთმანეთისადმი, მისი თქმით, იგივე უნდა მოხდეს მოსამართლეების დაცვის კუთხით.