დედაქალაქის ყოფილმა მერმა, სასამართლოს დარბაზიდან დღეს გათავისუფლებულმა გიგი უგულავამ განაცხადა, რომ არა აქვს მნიშვნელობა, უკან, ციხეში შებრუნდება თუ არა, მთავარი ისაა, რომ 9 თვეზე მეტხანს არცერთი ადამიანი არ იქნება წინასწარ პატიმრობაში.
მისივე თქმით, მთავარია, არჩევნებამდე მივიდეთ მშვიდად. გიგი უგულავამ მადლობა გადაუხადა იმ ადამიანებს, რომლებიც არცთუ გარკვეულ სიტუაციაში ელოდებოდნენ გადაწყვეტილების მიღებას. მისი თქმით, წინ ჯერ კიდევ შვიდი სასამართლოა და არანაირი გარანტია არ არსებობს, მაგრამ მთავარი ეს არ არის:
"დღეს ჩვენ ყველამ ვნახეთ, რომ სასამართლო იყო ძალიან ცუდ დღეში. თქვენ შეგიძლიათ თქვათ, რომ დღეს სასამართლო იყო ჯგუფი "გამოუვალი მდგომარეობა", უბრალოდ, საკონსტიტუციო სასამართლომ სხვა არჩევანი არ დაუტოვა", - განაცხადა გიგი უგულავამ.
დედაქალაქის ყოფილი მერი ამბობს, რომ მოქმედ ხელისუფლებას დაამარცხებენ ყველანაირ პირობებში: "შეცვლიან საარჩევნო სისტემას? მათთვის იქნება უკეთესი, რადგან საერთაშორისო აღიარება ექნება ამ არჩევნებს და მოვუგებთ, არ შეცვლიან? მათივე საარჩევნო სისტემით მოვუგებთ. იქნება ვადამდელი არჩევნები? ვადამდელში მოვუგებთ; იქნება ეს 2016 წლის ოქტომბერი? 2016 წელს მოვუგებთ", - განაცხადა გიგი უგულავამ "რუსთავი-2"-ის პირდაპირ ეთერში.
