2015-09-14 15:15

"არსადაც არ გავალ, თუნდაც სისხლის ფასად დამიჯდეს, მოვიდეს შს მინისტრი და გამიყვანოს აქედან, თუ მაგარია. მინდა ღარიბაშვილს მივმართო: მე გარტყმას ავიტან, მაგრამ მე კი არ გამარტყეს, აქ მდგომ თითოეულ გლეხს გაარტყეს. სწორედ ღარიბაშვილის გამოსვლის შემდეგ პოლიციის მასას გამოეყო ადამიანი, რომელმაც სახეში დამარტყა და გაიქცა",

ამის შესახებ დეპუტატმა გიორგი ღვინიაშვილმა განაცხადა, რომელსაც ინტერვიუს ჩაწერის დროს უცნობი პირი დაესხა თავს და სახეში ჩაარტყა, შემდეგ კი აქციაზე შეკრებილი გლეხებს პოლიციის კორდონის მიმართულებით გაექცა. პოლიციელებმა ის დააკავეს, თუმცა, რამდენიმე გლეხმა სიტყვებით "რატომ გაარტყი ღვინიაშვილს?" მას პოლიციის მანქანასთან ხელი გაარტყა. აქციის მონაწილეები აცხადებენ, რომ ეს ახალგაზრდა მევენახე და აქციის მონაწილე არ არის.

მანამდე მთავრობის სხდომაზე ირაკლი ღარიბაშვილმა მევენახეების აქციის შეწყვეტა შს მინისტრს დაავალა. მასვე დაევალა აქციის გათავისუფლება პროვოკატორებისგან. პროვოკატორებში ირაკლი ღარიბაშვილმა "ნაციონალური მოძრაობა" და კონკრეტულად, გიორგი ღვინიაშვილი იგულისხმა: "გიორგი ღვინიაშვილი, რომელიც ყოფილი გუბერნატორია, ახლაც ცდილობს, ერთგულება დაუმტკიცოს გუბერნატორს, ოღონდ არა კახეთის, არამედ ოდესის. იქ იმყოფება", - აღნიშნა პრემიერმინისტრმა.

კახელმა მევენახეებმა გურჯაანში თელავი-თბილისის გზა გადაკეტეს. ისინი მთავრობის წარმომადგენლებთან, კონკრეტულად, პრემიერმინისტრთან და სოფლის მეურნეობის მინისტრთან შეხვედრას ითხოვენ: "ვინც გინდა, ის დამეხმაროს, გინდა ღვინიაშვილი იყოს, გინდა ნათელაშვილი და გინდა ინაშვილმა დაიწეროს "აჩოკები" სულ არ მაინტერესებს, ვინც გვერდით დამიდგება, იმასთან ვიდგები", - აცხადებს აქციის ერთერთი მონაწილე.