2015-08-24 13:59

რუსეთის ეკონომიკური განვითარების მინისტრი ალექსი ულუკაევი არ გამორიცხავს, რომ ბარელი ნავთობის ფასი მსოფლიო ბაზარზე დროებით 40 დოლარზე ქვემოთაც დაეშვას. 

ამასთან, მინისტრმა ივარაუდა, რომ ნავთობი ფასი ამ ნიშნულზე დიდხანს ვერ დარჩება.

ნავთობის ნედლეულის ფასი 24 აგვისტოს ბოლო 16 წლის განმავლობაში ყველაზე დაბალ ნიშნულზე დაფიქსირდა. WTI მარკის ნავთობი ბაზარზე 40 დოლარზე ნაკლებია, ხოლო Brent მარკის ნავთობის ფასი 45 დოლარია ბარელზე.

11 აგვისტოს გამოქვეყნებულ მოხსენებაში მსოფლიო ბანკის ექსპერტებმა ივარაუდეს, რომ ირანის გათავისუფლება სანქციებისგან და ქვეყნის სრულფასოვანი დაბრუნება ბაზარზე მსოფლიოში, 2016 წელს მიგვიყვანს ბარელი ნავთობის არნახულად დაბალ ფასამდე - 10 აშშ დოლარამდე.

დღეს დილით თეირანმა პირობა დადო, რომ ნავთობის მოპოვების პროცესს დააჩქარებს. ირანის ნავთობნედლეულის მინისტრმა განაცხადა, რომ უერთდება ოპეკის ქვეყნების წინადადებას, მოიწვიონ საგანგებო სხდომა ნავთობის ფასის ვარდნასთან დაკავშირებით.