2015-06-28 21:31

„პოსტსკრიპტუმი“ ახალ სკანდალს ახმაურებს, რომელიც აჭარის მთავრობას ეხება და ცენტრალურ ხელისუფლებას უკავშირდება: ნოდარ მელაძის სიუჟეტის მიხედვით, ბათუმის საკრებულოს მოქმედი თავმჯდომარე თავად იჯდა იმ მანქანაში, რომლითაც თურქეთიდან ნარკოტიკი შემოიტანეს და შსს-მ დააკავა. 

მედეა ვასაძე ამბობს, რომ ამის შესახებ მაშინვე აცნობა ირაკლი ღარიბაშვილს, რომელმაც ამ ფაქტის გასაიდუმლოება სთხოვა და დაჰპირდა, რომ საქმეს აუცილებლად გამოიძიებდნენ, ხოლო საპარლამენტო უმრავლესობის ლიდერმა დავით საგანელიძემ განუცხადა, რომ გამორიცხულია, ეს ფაქტი დაიმალოს.

მედეა ვასაძე ამბობს, რომ ირაკლი ღარიბაშვილის თხოვნით, ამ ფაქტზე ექვსთვიანი მორატორიუმი გამოაცხადა და ჟურნალისტებთან არაფერი უთქვამს, მაგრამ როცა საქმე გაყინული წერტილიდან არ დაიძრა, ინფორმაციის მოძიება თავად დაიწყო.

მან შსს-დან გამოითხოვა ინფორმაცია იმის შესახებ, გადაკვეთა თუ არა ირაკლი ჭეიშვილის სახელმწიფო მანქანამ სარფის საზღვარი და რამდენჯერ, ხოლო ინფორმაციის დადასტურების შემდეგ ეს მონაცემები აჭარის უმაღლეს საბჭოს გადაუგზავნა და ფაქტის ადმინისტრაციული შესწავლა სთხოვა, თუმცა, არც ეს მოხდა.