„შუსტერ ლაივის“ ეთერში ოდესის გუბერნატორმა, საქართველოს მესამე პრეზიდენტმა მიხეილ სააკაშვილმა უკრაინის პრემიერმინისტრიც გააკრიტიკა და განაცხადა, რომ თუ ოდესაში კადრების დანიშვნა კიევიდან, მასთან შეთანხმების გარეშე გაგრძელდება, არაფერი გამოვა.
უკრაინის პრემიერმინისტრზე საუბრისას მიხეილ სააკაშვილი მიესალმა იაცენუკის გადაწყვეტილებას, რომ რაც ოდესიდან ბიუჯეტში გაზრდილი შემოსავლები შევა, ყველა ზეგეგმითი თანხიდან 50% ოდესის ოლქში გზების მშენებლობას მოხმარდება:
„პრემიერი სიტყვაზე გამოვიჭიროთ, თქვენი დახმარება დამჭირდება, მაგრამ ვფიქრობ, ის პატიოსანი კაცია და სიტყვას არ გადავა, მაგრამ იმ პირობებში, როცა ამბობენ, რომ შემოსავლებზე პასუხისმგებელი იქნება სააკაშვილი, ხოლო საბაჟოში კადრებს კიევიდან ნიშნავენ, ბატონ პრემიერს უნდა ვუთხრა, რომ არაფერი გამოვა“, - განაცხადა სააკაშვილმა.
მისივე თქმით, ოთხშაბათს კიევიდან, ოდესის საბაჟოს უფროსის მოვალეობის დროებით შემსრულებლად დანიშნეს ადამიანი, რომელსაც გუბერნატორმა „კატასტროფა“ უწოდა და დაამატა, რომ მასთან ერთად ვერ იმუშავებს:
„ასე არ იქნება... მე კიევში დავაყენებ საკითხს საბაჟოზე პასუხისმგებელ უწყებასთანაც და პრემიერმინისტრთანაც: უნდათ შემოსავლის გაზრდა? უნდათ, რომ ოდესაში ხალხმა უკეთ იცხოვროს? მაშინ მე უნდა მივხედო ამ საქმეს...
აქ კი რა ხდება? ისევ კიევიდან ინიშნებიან კლანის წარმომადგენლები... მე მეუბნებიან ხოლმე, იცი, ის რა კაცია? იცი, იმას ორი ტელევიზია აქვს... იცი, იმას ხმები აქვს რადაში... არ მაინტერესებს, მიმიფურთხებია!.. ხალხია მთავარი!..“, - სააკაშვილის ამ სიტყვებს დარბაზი ოვაციებით შეხვდა.
