2015-04-03 13:46

საქართველოს ყოფილმა თავდაცვის მინისტრმა, "თავისუფალი დემოკრატების" ლიდერმა ირაკლი ალასანიამ სპეციალური განცხადება გააკეთა.

„რასაკვირველია, მე ვერ გეტყვით, რა სახის ოპერატიული და ტაქტიკური საშუალებები განთავსდებოდა საქართველოში ამ შეთანხმების ხელმოწერის შემთხვევაში, მაგრამ მე შემიძლია გითხრათ, რისგან თავდაცვა შეგვეძლებოდა.

პირველ რიგში, ნებისმიერი მოიერიშე, ნებისმიერი ბომბდამშენი იქნებოდა საქართველოს საჰაერო სივრცეში შემოსვლის შესაძლებლობის გარეშე.

ეს ნიშნავს, რომ ჩვენ გვექნებოდა საშუალება, გავმკლავებოდით საშუალო და მოკლე სიშორის ბალისტიკური რაკეტებს, როგორიცაა „ისკანდერი“ და სხვა...

„თავისუფალი დემოკრატები“ ვსვამთ კითხვას, რასთან გვაქვს საქმე, რომ ექვსი თვის შემდეგაც ეს შეთანხმება არ არის ხელმოწერილი. ლოგიკურად, შეთანხმების ხელმოწერის შემდეგ არის ვადები, როცა შეთანხმება უნდა ამოქმედდეს. რადგან ეს ვადები გასულია, ამ ეტაპზე ეს შანსი ხელიდანაა გაშვებული.

სწორედ ასეთი ერთ-ერთი ფუნდამენტური შესაძლებლობის შეძენაზე ათქმევინეს უარი საქართველოს ბატონმა ივანიშვილმა და ბატონმა ღარიბაშვილმა. იმიტომ, რომ მათ არასდროს არავინ არ დაუკარგავთ ომში და არასდროს არ ჰქონიათ გულწრფელი სოლიდარობა საქართველოს სამხედროებთან, თავდაცვასთან და ჩვენი ქვეყნის ჯართან“.