2014-01-31 18:49

ავტომობილების ტექდათვალიერების ღირებულება 50 ლარზე მეტი არ იქნება და ის 2015 წლის მარტიდან დაიწყება - ამის შესახებ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა, ალექსი პეტრიაშვილმა განაცხადა.

როგორც მინისტრმა აღნიშნა, ტექდათვალიერება მოსახლეობას მძიმე ტვირთად არ დააწვება. ავტოსატრასპორტო საშუალებების ტექდათვალიერება საქართველოში სავალდებულო 2015 წლის პირველი მარტიდან ხდება.

ამ დროისთვის საქართველოს ტერიტორიაზე 900 000 – მდე ავტოსატრანსპორტო საშუალებაა რეგისტრირებული და როგორც გარემოს დაცვის სამინისტროში აცხადებენ, კონტროლის არარსებობის პირობებში სავარაუდოა, რომ ავტომობილების უმრავლესობა ტექნიკურად გაუმართავი იყოს. ავტომობილებზე ტექდათვალიერება 2004 წელს გაუქმდა.

მაშინ „საგზაო უსაფრთხოების შესახებ“კანონში გაკეთდა ჩანაწერი, რომლის მიხედვითაც ავტომანქანების ტექდათვალიერება 2013 წლის 1 იანვრიდან უნდა განახლებულიყო.

ხელისუფლების შეცვლის შემდეგ, პარლამენტმა ე.წ. გამარტივებული წესით „საგზაო მოძრაობის უსაფრთხოების შესახებ“კანონში ცვლილებების პროექტი დაამტკიცა. 2013 წლის 24 დეკემბერს, პარლამენტმა მხარი დაუჭირა ეკონომიკის სამინისტროს ინიციატივას, რომლის მიხედვითაც, ტექდათვალიერების გავლის აუცილებლობამ 2015 წლის 1 მარტამდე გადაიწია.