როგორც ცნობილია, ზაფხულში ცნობილი რუსი მომღერლები იოსებ კობზონი, ოლეგ გაზმანოვი და ალა პერფილოვა, იგივე ვალერია ლატვიის მიერ არასასურველ პერსონებად გამოცხადდნენ და მათ იურმალის ფესტივალ "ნოვაია ვოლნაში" მონაწილეობა აეკრძალათ.
მაშინ გადაწყვეტილება ლატვიის საგარეო საქმეთა სამინისტრომ მიიღო და მომღერლებს განუსაზღვრელი ვადით ქვეყანაში შესვლა აუკრძალა.
„ზემოთხსენებული პირები თავიანთი ქმედებით ხელს უწყობდნენ და აქეზებდნენ უკრაინის ტერიტორიული მთლიანობის ხელყოფას. მინისტრის გადაწყვეტილება მიღებულია იმიგრაციის შესახებ კანონის 61-ე მუხლის მეორე ნაწილის თანახმად“, - ნათქვამი იყო განცხადებაში, რომელსაც ხელს აწერდა ლატვიის საგარეო საქმეთა მინისტრი ედგარს რინკევიჩსი.
როგორც ჩანს, ეს ამბავი მომღერლებს ძაღლის ნაკბენივით დაამახსოვრდათ, რადგან რუსეთის ტელევიზიით გადაცემულ მთავარ საახალწლო კონცერტზე მათ ჩაკეტილ შლაგბაუმთან, სწორედ სანქციებზე იმღერეს. მათი სიმღერის ტექსტში იყო ფრაზები "ჩვენ დავბრუნდებით იურმალაში"; "სიმღერას არავითარი საზღვრები და სანქციები არ სჭირდება" და სხვ.
იმ მომღერლებსა და ცნობილ სახეებს შორის, ვინც ამ ტრიოს გამოჩენას ოვაციით მიესალმნენ, სოსო პავლიაშვილიც იყო.
