მოსკოვის ერთერთ ფეშენებელურ სასტუმრო "ნაციონალში" სიცოცხლე თვითმკვლელობით დაასრულა გავლენიანმა ბიზნესმენმა, ეთნიკურად ქართველმა რუსეთის მოქალაქემ (ის საქართველოში, აფხაზეთშია დაბადებული) ივანე შერვაშიძემ. შემთხვევა ცოტა ხნის წინ მოხდა, თვითმკვლელობა სათვალთვალო კამერებმა გადაიღეს.
კადრებში ჩანს, რომ ბიზნესმენი სასტუმროს დერეფანში ბოლთას სცემს, შემდეგ კი ჩანთიდან, წინასწარი ინფორმაციით, "ლუგერის" მარკის პისტოლეტს იღებს (9 მმ), ლულას პირში იდებს და ჩახმახს აწვება.
სროლის ხმაზე სასტუმროს ადმინისტრაციამ პოლიცია გამოიძახა. ცხედრის დათვალიერებისას აღმოჩნდა, რომ ბიზნესმენმა თვითმკვლელობა წინასწარ დაგეგმა: მან დატოვა ანდერძი, სადაც ქონება მემკვიდრეებსა და ნათესავებს შორისაა გადანაწილებული, ასევე საგანგებო ჩანაწერი, სადაც ითხოვს, რომ მისი ფერფლი შავ ზღვაში მიმოაბნიონ.
ცალკეული მედიასაშუალებები, მათ შორის, უცხოურიც, არ გამორიცხავენ, რომ ბიზნესმენის გადაწყვეტილება სუიციდის თაობაზე რუბლის მკვეთრ ვარდნას უკავშირდება.
