2014-12-16 20:18

მას შემდეგ, რაც სოზარ სუბარმა დავით ონოფრიშვილის საქმიანობა გააკრიტიკა და იგი ოპოზიციად მოიხსენია, გაჩნდა ეჭვი, რომ სულ მალე საფინანსო-საბიუჯეტო კომიტეტის თავმჯდომარეს გადააყენებენ.

„რაკი სოზარ სუბარი გავაკრიტიკე,  არ ვთვლი, რომ უნდა გადავდგე, ან გადამაყენონ. თუ ვინმე ჩემს გადაყენებას აპირებს, ვნახოთ რა მოტივაცია იქნება.

ამას პარლამენტის წევრთა 76 ხმა სჭირდება. ვიდრე პარლამენტის საფინანსო-საბიუჯეტო კომიტეტის თავმჯდომარე ვარ, პირუთვნელად, პრინციპულად დავიცავ ჩემს უფლებამოსილებას, ვიზიარებ იმ პასუხისმგებლობას, რომ როცა ადგილი ექნება არამიზნობრივ ხარჯებს ან ბიუჯეტის ათვისებაში ჩამორჩენას თუ სხვას, სწორედაც რომ კრიტიკული ვიყო.

სანამ პარლამენტის საფინანსო-საბიუჯეტო კომიტეტის თავმჯდომარე ვარ, ჩემს ფუნქციებს შევასრულებ ისე, როგორც საჭიროა", - განაცხადა დავით ონოფრიშვილმა.

თავის მხრივ, სუბარს არ მოსწონს, რომ ონოფრიშვილი  ბიუჯეტის ხარჯვას აკონტროლებს.

„ჩემთვის ცოტა გაუგებარი ვითარებაა – შეიძლება, გარემოს დაცვის კომიტეტის ან რომელიმე სხვა კომიტეტის თავმჯდომარე, მოადგილე იყოს ოპოზიციონერი, მაგრამ საფინანსო-საბიუჯეტო კომიტეტის თავმჯდომარე არ შეიძლება, იყოს ოპოზიციონერი.

ოპოზიციონერი თუ განმისაზღვრავს ქვეყნის ბიუჯეტს და რაში ვხარჯო ფული, მაშინ ის ყოფილა ხელისუფლება და მე - ვყოფილვარ ოპოზიცია. ეს ჩვენი სისუსტეა", - განაცხადა სუბარმა.