თელავის საკრებულოს წევრს ფიზიკური დაზიანება პოლიციელთა თანდასწრებით მიაყენეს, - ამის სესახებ „კახეთის საინფორმაციო ცენტრი“ იტყობინება. 26 აგვისტოს, დაახლოებით 20:00 საათზე, თელავში, ქალაქის ცენტრში „გაერთიანებული ოპოზიციიდან“ საკრებულოს წევრი ნიკა ვარდოშვილი ცემეს.
მას დაზიანებები სახის არეში აქვს მიყენებული. თვითმხილველების თქმით, ვარდოშვილს ფიზიკურად სასტუმრო „ძველი თელავის“ მენეჯერი შალვა სეფიშვილი გაუსწორდა. ნიკა ვარდოშვილი კი ამბობს, რომ ცემაში სასტუმროს მეპატრონე შოთა დემინაშვილიც მონაწილეობდა, შემთხვევის ადგილზე მყოფმა პოლიციის თანამშრომელმა კი დანაშაული არ აღკვეთა.
სასტუმრო „ძველი თელავის“ მესაკუთრე ბიზნესმენი შოთა დემინაშვილი ამბობს, რომ ნიკა ვარდოშვილი ნასვამი იყო, სასტუმროს თანამშრომლებს შეურაცხყოფა მიაყენა, აგინებდა და მისი კუთვნილი მანქანის დამტვრევას ცდილობდა. მისივე თქმით, ჩხუბიც ამას მოჰყვა. ნიკა ვარდოშვილი დემინაშვილის განცხადებას უარყოფს. მეგობრებმა ის თელავის რეფერალურ საავადმყოფოში გადაიყვანეს. ვარდოშვილს ტუჩი გახეთქილი აქვს, შუბლზე ნაკაწრები აღენიშნება, მუცლის არეში კი დალურჯებები. დაშავებულს თელავის რეფერალურ საავადმყოფოში გამოკვლევები უტარდება. ამ დროისთის უცნობია ნიკა ვარდოშვილის ცემის ფაქტზე აღძრულია თუ არა სისხლის სამართლის საქმე. შეგახსენებთ, ნიკა ვარდოშვილმა ადგილობრივი თვითმმართველობის არჩევნებში კახა კუკავა – ფიქრია ჩიხრაძის საარჩევნო ბლოკიდან მიიღო მონაწილეობა და პარტიული სიით საკრებულოს წევრი გახდა.
