2014-08-21 06:26

კინორეჟისორი რეზო ჩხეიძე "საქართველო და მსოფლიოსთან" საუბარში აცხადებს, რომ აშშ "საზიზღარი აგრესორია", ხოლო რუსეთმა "ძალიან მნიშვნელოვანი რამ გააკეთა საქართველოსთვის" და ხელისუფლებამ გეზი სწორედ მისკენ უნდა აიღოს. 

ინტერვიუში, რომელიც 2014 წლის მაისში გამოქვეყნდა, რეზო ჩხეიძე რუსეთ-საქართველოს ურთიერთობის სხვა ასპექტებზეც საუბრობს. "აფხაზეთის ხმა" გთავაზობთ ამონარიდებს ინტერვიუდან:

„…ასეც არ იყო საქმე როგორც ზოგი წერს, რუსეთმა ძალიან მნიშვნელოვანი რამ გააკეთა საქართველოსთვის … გაიხსენეთ ჩვენი კლასიკოსები, მეცნიერები და იმჟამინდელი განათლების დონე, ქართული კინო მსოფლიოში წამყვან პოზიციაზე რომ იდგა სწორედ რუსეთის დამსახურებაა, ყველა გამოჩენილმა რეჟისორმა „ვგიკი“ დაამთავრა…

მიმაჩნია, რომ ჩვენმა ხელისუფლებამ გეზი რუსეთისკენ უნდა აიღოს, ჯერ ერთი, მეზობელი სახელმწიფოა რასაც დიდი მნიშვნელობა აქვს, მეორეც-მართლმადიდებელი ქვეყანაა და, ყველაფერს თავი, რომ დავანებოთ, ვიცნობთ რუსეთს.“;

 ამერიკა მსოფლიოშია გაბატონებული და ცდილობს, ქვეყნები შიშით ან ფულით ჩაიგდოს ხელში. ადრე, ჯონ კენედის პრეზიდენტობის ჩათვლით, აშშ დემოკრატიული სახელმწიფო იყო, დღეს კი საზიზღარი, აგრესორია. ადრეც და ახლაც მრავალჯერ ვარ ამ ქვეყანაში ნამყოფი და, როგორც ცა და დედამიწა, ისე განსხვავდება ერთმანეთისგან ძველი და ახლანდელი.

ცხონებულმა სოფიკო ჭიაურელმა თქვა, ქართველებმა ცურვა არ ვიცით და ოკეანის გადაღმა რა გვესაქმებაო, _ ზუსტად ასეა ჩვენი საქმე. მართალია, საქართველო ილიასა და აკაკის ეპოქაში რუსეთის კოლონია იყო, მაგრამ არც ისე იყო საქმე, როგორც ზოგი წერს.

რუსეთმა ძალიან მნიშვნელოვანი რამ გააკეთა საქართველოსთვის. დავიწყოთ კულტურით. რომ არა რუსეთი, ილია ჭავჭავაძე და «სამოციანელები» არ იქნებოდნენ, რადგან ბიზანტიის იმპერიის დაცემის შემდეგ ევროპული კულტურა საქართველოში აღარ შემოდიოდა. ერთადერთი გზა, რომელიც დაგვრჩა, პეტერბურგი იყო და ჩვენმა დიდმა მოღვაწეებმაც ამ ქალაქის უნივერსიტეტში მიიღეს განათლება..."

წყარო