"აფხაზეთის ხმის" ინფორმაციით, ამ დრომდე უკიდურესად დაძაბულია სიტუაცია ზუგდიდში, "ნაციონალური მოძრაობის" ოფისთან, სადაც რამდენიმე წუთის წინ ათეულობით პირი შეიჭრა და ოფისი დაარბია, ხოლო შტაბის წევრებს ფიზიკური შეურაცხყოფა მიაყენა.
"აფხაზეთის ხმის" ინფორმაციით, ფიზიკური შეურაცხყოფა მიაყენეს ოფისში მყოფ თენგიზ გუნავას, ასევე საარჩევნო შტაბის წევრებს, მათ შორის, ქალებსაც. მანამდე მოქალაქეთა ჯგუფმა შენობას გარედან ქვები დაუშინა. დარბეულია შენობა, დამტვრეულია ინვენტარი.
ოფისში შეჭრილ პირებთან ერთად იმყოფებოდნენ თავდაცვის სამინისტროს ყოფილი ოფიცრის პაატა ქარდავას ახლობლები. შეგახსენებთ, პაატა ქარდავას მკვლელობაში შსს-მ გუშინ რომან შამათავა დაადანაშაულა, ხოლო ოჯახის წევრები აცხადებენ, რომ პაატა ქარდავას გაუჩინერაბაში თენგიზ გუნავას ხელი ურევია.
როგორც "აფხაზეთის ხმას" საარჩევნო შტაბის ერთერთმა წევრმა უთხრა, ამ დროისთვის ისინი ოფისში არიან შეკეტილი, გარეთ მყოფებს შორის კი, რომლებმაც შენობას ალყა შემოარტყეს, "ქართული ოცნების" აქტივისტებიც არიან.
"ძალიან გთხოვთ, მიაწვდინეთ ხმა საერთაშორისო ორგანიზაციებს და სამართალდამცველ, ადამიანის უფლებადამცველ ორგანიზაციებს - შესაძლოა, ჩვენი უსაფრთხოება კითხვის ნიშნის ქვეშ აღმოჩნდეს და ჩვენს სიცოცხლესაც საფრთხე დაემუქროს", - აცხადებს თენგიზ გუნავას საარჩევნო შტაბის წევრი.