-
2015-12-20 02:08
საქართველოში ანალიტიკოსთა და პოლიტიკოსთა ნაწილის მიერ გამოთქმული მოსაზრებები იმის შესახებ, რომ რუსეთმა, შესაძლოა, საქართველოში "ანტიტერორისტული" საბაბით შემოსვლა სცადოს, როგორც ჩანს, საფუძველს მოკლებული არ არის: რუსული მედიის განსაკუთრებით პროკრემლისტურ ნაწილში ჩვენთვის საგანგაშო ინფორმაცია ქვეყნდება.
მაგალითად, "ლაიფნიუსი" წერს, რომ 19 წლის გოგონა, რომელიც რუსეთში ტერორისტულ აქტებს გეგმავს, თანამოაზრეებთან ერთად საქართველოში იმყოფება, სადაც ის თურქეთიდან, 2015 წლის ივლისში შემოვიდა: "სპეცსამსახურები გოგონას ეძებენ, რომელიც რუსეთში ტერაქტების დაგეგმვაშია ეჭვმიტანილი" - ასეთი სათაურით დღეს სტატიები რამდენიმე გამოცემამ გაავრცელა.
სტატიაში აღნიშნულია, რომ გოგონას დონის როსტოვის სამართალდამცველები, სპეცსამსახურებთან ერთად ეძებენ და ის, მათი ინფორმაციით, საქართველოში იმყოფება. წყაროს ცნობით, გოგონა თავის ტვინის სიმსივნითაა დაავადებული. ამ მიზეზით მას ჩრდილოეთ კავკასიის სახელმწიფო სამსახურის აკადემიაში სწავლის შეწყვეტაც კი მოუწია.
ოიგულ მ. - ასე მოიხსენიებს რუსული პრესა გოგონას, რომელიც სკოლაში დონის როსტოვში სწავლობდა, შემდეგ კი ინგუშეთში მცხოვრებ სამ პირთან ერთად ჯერ თურქეთში, შემდეგ კი საქართველოში გადავიდა, სახელდება ასევე ბულატ ა., რომელთან ერთადაც, თითქოს, გოგონა თავის აფეთქებას გეგმავს რუსეთში.