-
2014-12-04 09:13
გროზნოში გვიან ღამით ბოევიკებსა და სამართალდამცველებს შორის მიმდინარე შეიარაღებული დაპირისპირების შესახებ რამზან კადიროვი "ინსტაგრამზე" ინფორმაციას ავრცელებს და წერს, რომ ექვსი ბოევიკი ლიკვიდირებულია.
"ვერცერთი ბოევიკი ვერ მოახერხებს გაქცევას! ექვსივე ლიკვიდირებულია, ოპერაციას თავად ვხელმძღვანელობდი. ახლა ჩვენი მთავარი ამოცანაა, არ დავუშვათ მსხვერპლი მშვიდობიან მოსახლეობაში", - წერს კადიროვი.
მისივე თქმით, ბოევიკები, რომლებმაც გუშინ გროზნოს ცენტრში შენობა დაიკავეს, პოლიციის ფორმაში იყვნენ გადაცმულნი.
ტვ "დოჟდის" ცნობით, რომელსაც ინფორმაცია თვითმხილველმა მიაწოდა, ბოევიკები გროზნოში ურუს-მარტინის სოფელ შალაჯიდან ჩავიდნენ. მათ ტაქსი სოფელში გამოიძახეს, შემდეგ სამი მძღოლი გაკოჭეს და სოფელში დატოვეს, თავად კი დედაქალაქში წამოვიდნენ. წყაროს ცნობით, ბოევიკები თავდაპირველად ერთერთ მეჩეთთან მდებარე საგზაო პოლიციის პოსტს დაესხნენ თავს, შემდეგ კი ახლოს მდებარე "პრესის სახლს" მიაშურეს, რომელსაც მალე პოლიციამ ალყა შემოარტყა. ინფორმაცია იმის შესახებ, რომ ანტიტერორისტული ოპერაციის დროს ხუთი პოლიციელი დაიღუპა, "რია ნოვოსტიმ" გაავრცელა. ამჟამად ჩეჩნეთის დედაქალაქში კონტრტერორისტული ოპერაციის რეჟიმია გამოცხადებული.