2016-03-26 02:38

ჟურნალისტი გიორგი უძილაური ციხისძირიდან შეკვეთილში ლირიოდენდრონის კარჭაპით ტრანსპორტირებას "უნიკალურ საინჟინრო პროექტს" უწოდებს და იმედოვნებს, რომ ეს ოპერაცია გინესის რეკორდებში შევა. უძილაურის თქმით, "ნაცების" ნიანგის ცრემლები ოფიციალურად შეძენილი ხის გადარგვაზე საშიში ან სერიოზული არ არის. 

"ხე გადაიტანეს, პროექტი შედგა!", - ასე ეხმაურება გიორგი უძილაური გიგანტური ასწლოვანი ხის გადატანის პროცესის დასრულებას. შეგახსნებთ, შეკვეთილში ჯერჯერობით ვერ მოხერხდა ხის გადატანა ნაპიზე - ადგილზე ათამდე სპეცტექნიკა მუშაობს. მათ ჯერ ნაპირთან მიწა ამოხაპეს, შემდეგ კი პირიქით - ქვიშით ნაპირის შესვსება დაიწყეს. ორგანიზატორები იმედოვნებენ, რომ 26 მარტს პროექტს საბოლოოდ დაასრულებენ.

გიორგი უძილაური, "ფეისბუქი":

"ციხისძირიდან შეკვეთილში ხის ზღვით ტრანსპორტირება პირველ რიგში არის უნიკალური საინჟინრო პროექტი!

მსოფლიოში პირველად განხორციელდა ამ სირთულის ოპერაცია და მიუხედავად უამრავი სირთულეებისა (რთული მისადგომი, რკინიგზის სიახლოვე, ხის სიმაღლე და წონა, სახმელეთო ტრანსპორტისთვის უჩვეულო ტვირთი, 620 ტონის ტრანსპორტირება თავდაღმართზე, შეყვანა ბარჟაზე, რთული ამინდის მიუხედავად ტრანსპორტირება შეკვეთილამდე და გადმოტვირთვა) წარმატებით დასრულდა სმილე ემოცია
ნაციონალებიც და მათი ჯიბის მედიაც პროექტის წარუმატებლობის იმედით ბუჩქებში ჩაცუცქული დარჩა. ხე გადაიტანეს! 

უნიკალური პროექტი შედგა და უკვე მოექცა BBC-ს ყურადღების არეალში. ხვალ-ზეგ ამ უნიკალურ პროექტს გააშუქებენ სხვა უცხოური არხებიც და დიდი ალბათობით, ამხელა ხის ასეთი ტრანსპორტირება გინესის რეკორდებში შევა.

ავანტიურისტული პროექტია? უდაოდ! ღირდა რისკად? უდაოდ! სხვაგვარად წარმატებაც არ მიიღწევა. ნაცების ღლიცინი საშიშია? ნაცების არც ღლიცინია საშიში და არც სერიოზული მაუწყებლობა, მითუმეტეს მათი "ნიანგის ცრემლები" ოფიციალურად შეძენილი ხის გადარგვაზე.

იმავე ციხისძირში 2009-2012 წლებში ნაცებმა უმოწყალოდ გაჩეხეს ქარსაცავი ზოლის ათობით ხე, 2008 წელს ფოთში ნაცებმა გაჩეხეს 50 ჰექტარი ევკალიპტის ტყე, და მთელი ქვეყნის მასშტაბით 2006-2011 წლებში გასცეს 73 ლიცენზია 1.2 მილიონი კუბომეტრი ტყის გაჩეხვაზე! ამ ისტორიის მქონე პოლიტიკური ძალისგან ერთი ხის ტრანსპორტირების "გამასხარავება" იგივეა რაც მუმლი მუხისათვის.

მოკლედ, მადლობა ქართველ მშენებლებს და ზღვისა და ხმელეთის "ტრანსპორტნიკებს" უნიკალური და ურთულესი პროექტის განხორციელებისთვის".