-
2017-07-19 23:45
საქართველოს ოკუპირებული ტერიტორიების გასწვრივ, შიდა ქართლის საოკუპაციო ზოლზე, შესაძლოა, 25 ივლისიდან საქართველოს მოქალაქეთა ჯგუფმა მცოცავი ანექსიის პრევენციის მიზნით, პატრულირება დაიწყოს. პატრულირების დაწყებას საქართველოს ჯომარდობის ფედერაციის ყოფილი პრეზიდენტი დავით ქაცარავა აანონსებს.
დავით ქაცარავა წერს, რომ საინიციატივო ჯგუფის შეხვედრა 23 ივლისს გაიმართება და პატრულირებასთან დაკავშირებული ყველა დეტალი გაირკვევა. მისი თქმით, ეს ღონისძიებები იქნება "უიარაღო, მშვიდობიანი, მაგრამ მტკიცე და შეუვალი".
დავით ქაცარავა საოკუპაციო ზოლთან კარვების გაშლისა და პერმანენტული აქციების მოწყობის ინიციატივით ადრეც გამოვიდა. ის ანტისაოკუპაციო აქციებში აქტიურად მონაწილეობს. მონაწილეობდა ასევე 14 ივლისს, ბერშუეთში, გაზეთ "ქრონიკა პლუსის" ინიციატივით გამართულ ანტისაოკუპაციო აქციაში, სადაც მონაწილეობა ასეულობით ადამიანმა მიიღო.
დავით ქაცარავა წერს:
"ჩემო მეგობრებო!!!! საქართველოს მოქალაქენო!!!
ცოტა ხნის წინ გავაკეთე განცხადება რუსეთის დამყრობლურ, საოკუპაციო ქმედებებთან დაკავშირებით და დავდე პირობა რომ ვიწყებ ბრძოლას საოკუპაციო რეჟიმის წინააღმდეგ.
დადგა ის მომენტი, როდესაც თეორია პრაქტიკულ ქმედებაში უნდა გადმოვიტანოთ.
როგორც უკვე გავაჟღერე, იქმნება საქართველოს მოქალაქეებისგან შემდგარი ე.წ. დამკვირვებელთა სამოქალაქო ჯგუფები, რომლებიც უწყვეტ რეჟიმში გავლენ საქართველოს ოკუპირებულ ზონებში და დააკვირდებიან რუსი ოკუპანტის ქმედებებს.
ამ ჯგუფების ძირითადი ფუნქცია იქნება ოკუპანტის მხრიდან მცოცავი ოკუპაციის დაფიქსირება, საყოველთაო განგაშის ატეხვა, დროული ინფორმაციის მიწოდება საზოგადოებისთვის, გამოძახება საოკუპაციო ხაზთან ყველა იმ ადამიანის, ვისაც გული შესტკივა ჩვენი სამშობლოსთვის.
ჩვენი ჯგუფები უმალ ჩააყენებენ საქმის კურსში საერთაშორისო საზოგადოებას, ქართველ და უცხოელ ჟურნალისტებს, დიპლომატიური კორპუსის წარმომადგენლებს, რომლებიც დარწმუნებული ვარ სათანადო რეაგირებას გააკეთებენ მათი შესაძლებლობების ფარგლებში.
ჩვენ გამოვალთ ინტერნეტ სივრციდან და ვაჩვენებთ პირველ რიგში საკუთარ თავს, რომ ჩვენი წინაპრების ღირსეული შთამომავლები ვართ!
ჩვენი მოქმედება იქნება მშვიდობიანი, უიარაღო, მაგრამ მტკიცე და შეუვალი !!!
ამიერიდან ჩვენ ყველაფერს გავაკეთებთ იმისათვის რომ ჩვენ მტერს მშვიდად აღარ ეძინოს!!!!
საოკუპაციო ზოლთან სამოქალაქო პატრულირება დაიწყება 25 ივლისიდან.
მანამდე კი ჩვენ ველოდებით ყველა იმ ადამიანს ვინც თვლის რომ მისი ადგილი ამ სახალხო ლაშქარშია და მზად არის რუს ოკუპანტს თვალებში ჩახედოს, ხელი შეუშალოს ჩვენი ქვეყნის ოკუპაციაში!!!
მე მოვუწოდებ ყველა იმ ადამიანს, ვინც ფიზიკურად ვერ გამოვა ველზე, იბრძოლოს ჩვენთან ერთად იმ საინფორმაციო ომში რომელიც ჩვენი საერთო სტრატეგიის უმნიშვნელოვანესი შემადგენელი ნაწილია.
ჩვენ უნდა გავერთიანდეთ იმ ერთი მიზნის ირგვლივ, რასაც ჩვენი ქვეყნის დეოკუპაცია ჰქვია!!!
დავივიწყოთ ყველა წყენა, აზრთა სხვადასხვაობა და ერთად შევუტიოთ ჩვენს საერთო მტერს!!!
გთხოვთ კომენტარში დააფიქსიროს ყველამ მზაობა!!!!
ჩვენ გავერთთიანდებით და ჩვენ გავიმარჯვებთ!!!!!!
ძალა ერთობაშია!!!!!".