როტვეილერის ჯიშის ძაღლები და შუააზიური და კავკასიური ნაგაზები ოკუპირებულ აფხაზეთში განთავსებული რუსული სამხედრო ინფრასტრუქტურის დაცვაში იქნებიან ჩართული. ამ ეტაპზე ძაღლების საწვრთნელი ეტაპი მიმდინარეობს, - ამის შესახებ რუსეთის თავდაცვის სამინისტრო იტყობინება.
აფხაზეთში განთავსებულ ოკუპანტთა სამხედრო ბაზებზე ძაღლები გასული წლის დეკემბრის ბოლოს ჩაიყვანეს. როგორც თავდაცვის სამინისტროში აცხადებენ, ადგილზე იმყოფებიან კინოლოგები და ძაღლების ფსიქოლოგები, რომლებიც ამჯერად ცხოველებს ასწავლიან, როგორ გადალახონ წინააღმდეგობის ბარიერი, როგორ დააკავონ მოწინააღმდეგე და როგორ არ მიიღონ საკვები უცნობი პირის ხელით.
ძაღლების მოსავლელად მე-7 სამხედრო ბაზაზე (გუდაუთა) აშენდა კინოლოგიური ცენტრი, ცხოველების გამოსაკვებად ჩატანილია სპეციალური საკვებიც. ძაღლები არამარტო ინფრასრუქტურის დაცვაში მიიღებენ მონაწილეობას, არამედ ჩაერთვებიან საპატრულო ჯგუფებთან და ყარაულთან ერთად შემოვლით საკონტროლო გასვლებშიც.
