2015-10-08 23:18

ოკუპირებული აფხაზეთის ყოფილი ე.წ. საგარეო საქმეთა მინისტრი სერგეი შამბა, ერთერთ პრორუსულ პორტალთან საუბარში აფხაზეთში უძრავი ქონების უცხოელებზე გაყიდვასთან დაკავშირებით დაწყებულ დისკუსიას ეხმიანება და ვერ წარმოუდგენია, როგორ შეიძლება „ვითღაც ქართველმა“ ქონება შეიძინოს აფხაზეთში.

ჟურნალისტის შეკითხვაზე, რომ ექსპერტები ბიძინა ივანიშვილის ინიციატივით შექმნილი ფონდის მიზნად ივანიშვილის მიერ აფხაზეთში უძრავი ქონების ფართომასშტაბიან შესყიდვას ასახელებენ, სერგეი შამბა პასუხობს:

„მე ვერ გამოვრიცხავ, რომ ოდესღაც, ვიღაცამ შეიძლება მართლაც გაუწიოს ორგანიზება აფხაზეთში უძრავი ქონების შესყიდვის აქციას. მაგრამ ვერ წარმომიდგენია, როგორ იყიდის ამ ქონებას აფხაზეთში ვიღაც ქართველი? მერე რას უზამს ამ ქონებას, თუნდაც იყიდოს? ჩამოვა აქ და დაისვენებს? თუ იცხოვრებს? ეს არარეალური პროგრამაა, თუკი ის არსებობს სინამდვილეში. ქართველებმა აქ იარაღით ვერ დაიმკვიდრეს თავი და იარაღის გარეშე როგორ უნდა იცხოვრონ?“