2015-01-21 15:14

სოხუმის ცენტრალური პროზექტურიდან უცნობმა პირებმა გაიტაცეს სამი პირის ცხედარი. სამი პირი თვითგამოცხადებული აფხაზეთის რესპუბლიკის ე.წ. შინაგან საქმეთა სამისნისტროს დანაყოფმა სპეცოპერაციის დროს მოკლა. 

გატაცებულთა შორისაა ჯატო აქუბარდიას ცხედარიც, რომლის საცხოვრებელი სახლი გალის რაიონში დაწვეს აქუბარდიას ჯგუფის მიერ მოკლული აფხაზი ე.წ. მესაზღვრის ახლობლებმა და ჭირისუფლებმა. 

ცხედრების გატაცება სოხუმის პროზექტურიდან ფილმებში ნანახი სცენარით მოხდა: პროზექტურაში მისულმა ნიღბიანებმა მორიგეს კარი მოტყუებით გააღებინეს, შემდეგ კი ის ოთახში ჩაკეტეს და ცხედრები გაიტაცეს, რის შემდეგაც გაურკვეველი მიმართულებით მიიმალნენ.

იმის გათვალისწინებით, რომ აქუბარდია საქართველოს მოქალაქეა, აფხაზური მედია ვარაუდობს, რომ ცხედრები ქართული მხარის მიერ კონტროლირებად ტერიტორიაზე გადაიტანეს, რათა დაკრძალონ. მანამდე აფხაზურმა ადმინისტრაციამ უარი უთხრა ჭირისუფლებს ცხედრის გადაცემაზე.