2014-09-21 21:25

ქუთაისის ინფექციური საავადმყოფოდან გაქცეული პატიმარი რუსლან სოსელია შსს-ს სმეგრელო-ზემო სვანეთის სამხარეო პოლიციის თანამშრომლებმა მაშინ დააკავეს, როცა ის გალის რაიონში გადასვლას ცდილობდა. გაქცევის ფაქტთან დაკავშირებით სისხლის სამართლის საქმე საბადრაგო სამსახურის თანამშრომლის მიმართაც აღიძრა.

"მსჯავრდებული რუსლან სოსელია სამეგრელო-ზემო სვანეთის სამხარეო პოლიციის მთავარი სამმართველოსა და სასჯელაღსრულების დეპარტამენტის უსაფრთხოების სამსახურის თანამშრომელთა მიერ ერთობლივად გატარებული სამძებრო-ოპერატიული ღონისძიებების შედეგად, სოფელ რუხში დააკავეს, საიდანაც გამყოფი ხაზის გადაკვეთით, გალის რაიონში გადასვლას ცდილობდა.

მსჯავრდებული 21 სექტემბერს, გამთენიისას ქუთაისის ინფექციური საავადმყოფოს ტერიტორიიდან გაიქცა, სადაც გეგუთის N14 სასჯელაღსრულების დაწესებულებიდან მკურნალობის მიზნით იყო გადაყვანილი.

რუსლან სოსელიას მიმართ, საქმეზე დაწყებულია გამოძიება სისხლის სამართლის კოდექსის 379-ე მუხლის პირველი ნაწილით, ხოლო სასჯელაღსრულების დეპარტამენტის გარე დაცვისა და ბადრაგირების მთავარი სამმართველოს ქუთაისის განყოფილების თანამშრომელთა მიმართ - 342-ე პრიმა მუხლის პირველი ნაწილით", - ნათქვამია სასჯელაღსრულებისა და პრობაციის სამინისტროს განცხადებაში.