2014-05-10 09:42

„მე, როგორც თავდაცვის მინისტრი ვითხოვ შეიარაღებას და ეს ეტაპობრივად უნდა გაკეთდეს, ბუნებრივია, ვერ მოვითხოვდი ვიოლინოების პარტიას“, - ასე უპასუხა გადაცემაში „რეაქცია“ ირაკლი ალასანიამ ნატოს მიმართ მისი მოთხოვნის შესახებ  აგორებულ ხმებს.

შეგახსენებთ, ირაკლი ალასანიამ აშშ-ში ვიზიტის დროს ნატოს თავდაცვითი სისტემების საქართველოში განთავსება სესთავაზა, რასაც სამთავრობო გუნდში გაუგებრობა მოჰყვა. უშიშროების საბჭოს მდივანმა განაცხადა, რომ ირაკლი ალასანიას ეს განცხადება უნდა შეეთანხმებინა პრემიერმინისტრთან, მოგვიანებით კი ირინა იმერლიშვილს თავდაცვის სამინისტროდან უპასუხეს, რომ მინისტრის განცხადება შეთანხმებული იყო ირაკლი ღარიბაშვილთან.

„ამ მთავრობის მთავარი ამოცანა არის, რომ ჩვენს ჯარს ყველა შესაძლებლობა ჰქონდეს იმისთვის, რომ დაიცვას საკუთარი ქვეყნის თავისუფლება, ჩვენ სამხედორებს უნდა მივცეთ ის პირობები, რომლითაც ისინი საკუთარი მოვალეობის შესრულებას შეძლებენ. ეს არის ჩვენი მთავარი ამოცანა. მე, როგორც თავდაცვის მინისტრი, ვითხოვ შეიარაღებას და ეს ეტაპობრივად უნდა გაკეთდეს.

ბუნებრივია, ვერ მოვითხოვდი ვიოლინოების პარტიას. ჩვენი ამოცანა იქნება, რაც შეიძლება მეტად ავუხსნათ ყველას, თუ რას ნიშნავს ჩვენი ქვეყნისთვის საჭირო შეიარაღება, რათა რაც შეიძლება მეტად იყოს ჩვენი ცა დაცული საფრთხეებისგან“, - განაცხადა ირაკლი ალასანიამ „რეაქციაში“.