საქართველოს პრეზიდენტი გიორგი მარგველაშვილი „არჩევანში“ ამბობს, რომ გაეროს სამიტზე წასვლას თავადაც აპირებს და პრემიერს წარმატებულ ვიზიტს უსურვებს, ასევე, ხაზს უსვამს, რომ პრეზიდენტისგან გასულ კომუნიკაციას ეფექტური საგარეო კომუნიკაცია სჭირდება.
გიორგი მარგველაშვილის განცხადებით, სახელმწიფოს მეთაური პრეზიდენტია და ყველამ უნდა იცოდეს, რომ პრეზიდენტს გააჩნია წერილის დაწერისა და მასზე პასუხის გაცემის უნარი, ხოლო ცალკეული უწყებები არიან არა მთავრობის, არამედ საქართველოს სამინისტროები:
„როდესაც პრეზიდენტი იღებს მიწვევას საკუთარ სახელზე პრეზიდენტის საქმეა უპასუხოს მას და არა სხვა უწყებების. პრეზიდენტს გააჩნია შესაბამისი უნარი წერილის დაწერის და პასუხის გაცემის.
დარწმუნებაც აბსოლუტურად მისაღებია, მაგრამ ეს უნდა მოხდეს მანამ სანამ პასუხი გაეცემა ამ მიწვევას. ჩემს მიერ წასულ კომიუნიკაციას არ აქვს შესაბამისი მხარდაჭერა საგარეო საქმეთა სამინისტროდან. მნიშვნელოვანია გავიაზროთ, რომ ყველა უწყება არის არა მთავრობის სამინისტრო, არამედ საქართველოს სამინისტრო.
შესაბამისად ის ვალდებულებები რაც მათ გააჩნიათ, გააჩნიათ არა მხოლოდ მთავრობის მიმართ, არამედ ზოგადად გააჩნიათ ვალდებულებები, მათ შორის პრეზიდენტის საგარეო კომუნიკაციის ეფექტური უზრუნველყოფისთვის. ჩვენი სამინისტროები ემსახურება არა მთავრობას, არამედ სახელმწიფოს. მე ამით ვამბობ იმას, როგორც უნდა იყოს. მე და ჩემი კოლეგები არ ვიშურებთ დროს და ენერგიას რომ ეს ინფორმაცია ჩვენ კოლეგებს გავუზიაროთ სამინისტროებში, რომ მათ გააჩნიათ ვალდებულება არა მხოლოდ მთავრობის მიმართ არამედ სახელმწიფოს მიმართ.
სახელმწიფოს მეთაური პრეზიდენტია. შესაბამისად, თუ პრეზიდენტი აგზავნის წერილს, ეს წერილი უნდა მივიდეს დროზე, თუ პრეზიდენტს უგზავნიან წერილს - ეს წერილი უნდა მოვიდეს დროზე“, - განაცხადა პრეზიდენტმა „არჩევანში“.