2015-10-22 23:56

ერთიანი ნაციონალური მოძრაობის ლიდერი სამეგრელოს რეგიონში, სამეგრელო-ზემო სვანეთის ყოფილი გუბერნატორი და შსს გენინსპექციის ყოფილი უფროსი თენგიზ გუნავა, რომელიც მოქმედი ხელისუფლების პიობებში რამდენჯერმე დააკავეს, თუმცა, ბრალი ვერ დაუმტკიცეს, სოციალურ ქსელში წერს, რომ მკაცრად დაისჯებოდნენ სამეგრელოს სამალავების მომწყობი და იქ ადამიანთა წამებაში მონაწილე პირები, მას რომ რაიმე სცოდნოდა ამის შესახებ მანამ, სანამ კადრები გავრცელდებოდა. ამასთან, გუნავა აცხადებს, რომ პასუხისმგებლობას არ გაურბის.

"მინდა მივმართო საზოგადოებას: მე დღეს იმ ამაზრზენი ვიდეოების თემაზე კომენტარიც გავაკეთე - ჟურნალისტებმა მკითხეს, ვგრძნობდი თუ არა პასუხისმგებლობას იმის გამო, რაც მოხდა.

ვინც მიცნობს, იცის - პასუხისმგებლობას არასდროს გავურბივარ და ჩემი პასუხიც ცალსახა იყო, რომ დიახ, ვგრძნობ პასუხისმგებლობას!

რასაკვირველია, ჩვენ გვქონდა შეცდომები, ამისგან არავინაა დაზღვეული და ჩვენი მთავარი შეცდომა იყო ის რომ არ ველოდით ამას და გაგვეპარა ეს ფაქტი! რომ გვცოდნოდა, რომ გამეგო, სამეგრელოში მსგავსი ძალადობის მონაწილე პირები დაისჯებოდნენ კანონის სრული სიმკაცრით და არა ისე, როგორც დღეს ე.წ. ციხის კადრების მთავარი რეჟისორი, მთავარი მწამებელი ბედუკაძე და მისნაირები, რომლებიც გარეთ დატოვა ხელისუფლებამ, "გმირს" დაცვა დაუნიშნა, ზოგსაც საპროცესო გაუფორმა...