"აფხაზთა კრების" ლიდერი მალხაზ პატარაია აფხაზეთის ავტონომიური რესპუბლიკის ლეგიტიმური მთავრობის მინისტრის დიმა ჯაიანის მხრიდან ტვ "ობიექტივში" მისი მისამართით გამოთქმულ მუქარას პასუხობს.
საქმე ეხება სოხუმის უნივერსიტეტში ახალი სასწავლო წლის გახსნის დღეს მოწყობილ ფოტოგამოფენას, რომლის ჩაშლაც სურდათ დიმა ჯაიანსა და მის მოადგილეს, ხოლო "თავისუფალი ზონის" წევრ დავით გოგოხიასა და განათლების მინისტრის მოადგილეს შორის სიტყვიერი დაპირისპირება მოხდა. აქციის ინიციატორი "აფხაზთა კრება" იყო და მალხაზ პატარაია იმ დღეს ადგილზე იმყოფებოდა.
„დღეს მოვისმინე აფხაზეთის განათლების და კულტურის მინისტრის გუშინდელი ბნედები შავბნელი რუსული არხი ,,ობიექტივით“. აბა რა გითხრათ. როგორც იტყვიან კოკასა შიგან რაცა სდგასო. . . ალბათ, არც ღირს ამ აშკარად არაადეკვატური გამოხტომის კომენტარი, რომ არა ის უამრავი ტყუილი რომელიც ჩვენმა უგანათლებულესმა და უკულტურესმა გადმოაფრქვია.
ჯერ ერთი, ეს იყო "აფხაზთა კრების" აქცია და მასში მონაწილეობა მიიღეს ,,თავისუფალი ზონის“ წევრებმა, ღირსეულმა და გულიანმა ჩვენმა თანამემამულეებმა. მეორე, მასთან საუბარი იქვე მქონდა, რომლის ამსახველი ვიდეო სოციალურ ქსელებში არის. მაშინაც, როგორც ეხლა, ცრუპენტელობდა.
მაგალითად, რომ არ იცის მისი კოლმეურნეობის თავმჯდომარის და მამუკა არეშიძის მკრეხელური გამონათქვამები აფხაზეთის დამოუკიდებლობის შესახებ. მესამე და მთავარი: ეს ძველბიჭური კორიანტელი, რომ ვიმალები, მთელი საქართველო მეძებს, მიწიდან ამომთხრის და ა.შ. მაინც ცნობიერების წუთიერი შებინდება მგონია, ვიდრე ფხიზელი გონების ნაკარნახევი, თუმცა, ვინ იცის.
დიმა, ჩემს ოფისში ვარ როგორც ყოველთვის. არასოდეს დასამალი არაფერი მჭირდა და არც ეხლა მაქვს. იცი ეს შენ. თუ სინდისი გეყოფა, შეგიძლია მობრძანდე და თუ არ იცი, აგიხსნი, რომ ბურჯანაძე და მისი მიმდევრები რუსებია. ბურჯანაძის მიმდევრების მთავრობაში ყოფნა, ჭორვილელი ორჯონიკიძის ხელისუფლების სამსახური რუსეთუმეობა, კოლაბორაციონიზმი და ღალატია.
ასე, რომ ნუ გაგიკვირდება, თუ ვინმემ მე-11 არმიის ჯარისკაცად ან ოფიცრად მოგიხსენიოს. ადრე ამის თაობაზე, ჩვენი ძველი ურთიერთობიდან გამომდინარე, შენი მისამართით არაფერი მითქვამს. თუმცა ჩემი ზოგადი მოსაზრებების გაგება აქამდეც არ გაგიჭირდებოდა. მაგრამ, რადგან ამ წარსულს ბორიას ხონჩით თვალდაბნელებულმა, თავად გადაუსვი ხაზი, აწი სხვებისაგან ნამდვილად არ განგასხვავებ.
ისე, შეგიძლია არც შეწუხდე, ეხლა სხვა ღონისძიების მომზადებით ვართ დაკავებული და სულ მალე იქით მოგაკითხავთ.“ – წერს მალხაზ პატარაია.
