2015-08-28 08:14

საქართველოს კულტურის ყოფილი მინისტრი ნიკა რურუა წერს, რომ ნატოში გაწევრიანებისთვის MAP-ის მიღება სულაც არ არის ერთადერთი და უალტერნატივო გზა ალიანსში გასაწევრიანებლად, ამიტომ, მისი ვერმიღების შემთხვევაშიც კი, არ უნდა განვიხიბლოთ ან უიმედობა არ უნდა დაგვეუფლოს. 

"MAP, ანუ წევრობის სამოქმედო გეგმა მხოლოდ ინსტრუმენტია მიზნის მისაღწევად. მიზანი კი, მოგვეხსენება ყველას, საქართველოს NATO-ში გაწევრიანებაა.

ამდენად, მიზანი და მის მისაღწევად საჭირო ერთი კონკრეტული ინსტრუმენტი ერთმანეთში არ უნდა აგვერიოს. ინსტრუმენტი კი მაშინაა კარგი და გამოსაყენებელი, როცა ის მიზნის მისაღწევად საუკეთესო საშუალებაა.

MAP კონკრეტული ეპოქის და კონკრეტული ქვეყნებისთვის შექმნილი ინსტრუმენტია, რომელმაც, შესაძლოა დრო მოჭამა, და ტექნიკური თვალსაზრისით ის სულაც არაა ერთადერთი გზა სახელმწიფოს გაწევრიანებისთვის.

მეტიც, ამ ეტაპზე MAP-მა, რომელსაც დაცვის არანაირი გარანტია არ ახლავს, შესაძლოა, საქართველოს მეტი ზიანი მოუტანოს, ვიდრე დაახლოების სხვა ინსტრუმენტებმა.

ამიტომ, დასაშვებია ის მოსაზრება, რომ საქართველო ამ კონკრეტული ინსტრუმენტის გარეშეც გახდეს წევრი, თუ ის რეფორმებს გააგრძელებს და უფრო დემოკრატიულ სახელმწიფოდ იქცევა მათი ამ რეფორმების საშუალებით.

ამიტომ არ ღირს MAP-ზე ფიქსაცია და მისი ვერმიღების შემთხვევაში გარდაუვალ განხიბლვასა და უიმედობაში ჩავარდნა.

ვიმეორებ, ამ წუთს ალიანსთან დაახლოვება სხვა ინსტრუმენტებით და უფრო მეტად დემოკრატიულ ქვეყანად ქცევა უფრო რეალისტურ გზად მესახება.

როგორც ვიცით, NATO-ში გაწევრიანება ტექნიკურთან ერთად ალიანსის პოლიტიკური გადაწვეტილებაა უმთავრესად, და ამიტომ ამისთვის კონსენსუსის შენებაზე უნდა ვკონცერტრირდეთ ალიანსის ცალკეულ წევრ სახელმწიფოებთან.

MAP-ზე ფიქსაცია ინფანტილურიც კი მგონია, როცა გაწევრიანების სხვა გზებიც არსებობს. მთავარია მხნეობა, სურვილი და შრომა ჩვენი სახელმწიფოს მხრიდან, რაც სიზარმაცეს, უიმედობასა და რუსულ პროპაგანდას არ უნდა შეეწიროს.

საქართველო აუცილებლად გახდება ჩრდილო-ატლანტიკური ალიანსის წევრი, თუ საქართველოს აღარ ეყოლება პოლიტპატიმრები, ექნება კარგად დაცული და გარანტირებული ადამიანის უფლებები, ექნება თავისუფალი მედია, დამოუკიდებელი სასამართლო და დამოუკიდებელი პროკურატურა, და თავისუფალი ბაზარი.

დღეს ეს ალიანსის გენერალურმა მდივანმაც გაიმეორა საქართველოში. ამიტომ, გვერდზე გადავდოთ ინფანტილური წარა-მარაობა, სულსწრაფობა და მთელი სერიოზულობით გავაგრძელოდ მუშაობა ამ უმნიშვნელოვანესი მიზნის მისაღწევად.

და ეს გარდაუვალი გახდება MAP-ით თუ მის გარეშე", - წერს ნიკა რურუა.