ჩეხეთში, ერთ-ერთ ავტობანზე გადაადგილებისას, დიდი სიჩქარით მიმავალი მანქანის სალონში მყოფი ორი გოგოდან ერთი დაიღუპა ავარიის დროს, რომელიც "ფეისბუქის" პირდაპირ ეთერში მოხდა.
ვიდეო ინტერნეტში გავრცელდა. მასზე ჩანს ორი გოგო, რომელთაგან მძღოლის გვერდით მჯდომი "ფეისბუქის" ლაივის მეშვეობით მაყურებელს ესაუბრება.
საუბარში მძღოლიც ერთვება, რაც ყურადღების გაფანტვას იწვევს. ვიდეოზე ავარიის მომენტიცაა ასახული, თუმცა, არ ჩანს, რა დაბრკოლება შეხვდა ზაზე დიდი სიჩქარით მოძრავ მანქანას.
როგორც მოგვიანებით გახდა ცნობილი, მანქანა ავტობანზე 180 კმ/სთ სიჩქარით გადაადგილდებოდა. ვიდეოს მიხედვით, მძღოლმა საჭის დამორჩილება ვერ შეძლო, მართვა დაკარგა და კედელს შეეჯახა. ერთი გოგონა ადგილზე დაიღუპა, მეორემ კი თავის ქალის დახურული ტრავმა მიიღო და მძიმე მდგომარეობაშია. მანქანის სალონში დავარდნილ ტელეფონში "ფეისბუქის" ლაივი ავარიის შემდეგაც გრძელდებოდა.
"ფეისბუქის" ლაივის დროს ავარიის შემთხვევები საკმაოდ ხშირია. ბევრ ქვეყანაში მართვის დროს პირდაპირი ეთერის ჩართვა აკრძალული არ არის, რადგან მძღოლის ხელები ამ დროს არაა დაკავებული, თუმცა, ის იძულებულია, ხშირად მოწყვიტოს თვალი გზას და ყურადღება ტელეფონზე გადაიტანოს, რაც არცთუ იშვიათად, ფატალური შედეგით სრულდება.
2017 წლის მარტში მსგავსი შემთხვევა რუსეთში, ყაზანთან მოხდა, როცა ფბ-ლაივის დროს გოგონა, რომელიც მანქანას მართავდა, საპირისპირო მოძრაობის ზოლზე გადავიდა და ავტობუსს შეეჯახა. გოგონა ადგილზე დაიღუპა, ავტობუსში კი ხუთი ადამიანი დაშავდა.
