მარიუპოლში სიტუაცია ისევ დაძაბულია. ქალაქში რჩებიან უკრაინის შეიარაღებული ძალებისა და ადგილობრივთა თავდაცვითი რაზმებისგან შემდგარი ჯგუფები. ონლაინ ვებ-კამერა მარიუპოლის ცენტრისკენ, თავისუფლების (ყოფილი ლენინის) მოედნისკენაა მიმართული. ფანჯრის გახსნის შემდეგ ჩამონათვალში შედის ქალაქის სხვა ადგილების ვებკამერები.
ბმულზე გადასასვლელად საჭიროა მოძებნოთ წარწერა - + Мариуполь Трансляция Вэб-камера (ОТКРЫТЬ ОКНО). "აფხაზეთის ხმა" ამავე სტატიის ველში განათავსებს ყველა ახალ ინფორმაციას არსებული სიტუაციის შესახებ, ხოლო სტატიის ბოლოს არსებულ ვიდეოფანჯარაში ვიდეომასალები განახლდება აქტუალურობის მიხედვით.
5 სექტემბერი, 11:30
რუსი სამხედროებისა და სეპარატისტების მხრიდან ღამის განმავლობაში ე.წ. დაზვერვითი ბრძოლები მიმდინარეობდა, რომელშიც ცოცხალი ძალა არ ჩაბმულა. საარტილერიო დანადგარებიდან იბომბებოდა ქალაქის აღმოსავლეთ მისადგომები, თუმცა, შტურმი არ ყოფილა. როგორც მარიუპოლში ადგილობრივები და უკრაინის არმიის მეომრები ამბობენ, შტურმი დღესაა მოსალოდნელი. არ გამოირიცხება შეტევა ზღვის მხრიდანაც.
გუშინ, საღამოს საათებში მარიუპოლში იმყოფებოდნენ საერთაშორისო დამკვირვებლები. მათ განაცხადეს, რომ მარიუპოლის მისადგომებთან მდებარე სოფელ შიროკიში იწვის რამდენიმე ერთეული ტექნიკა. მათი მოხსენების მიხედვით, ამჟამად შიროკის ვერცერთი მხარე ვერ აკონტროლებს. დამკვირვებლები ქალაქის აღმოსავლეთ მისადგომებისთვის საარტილერიო ცეცხლის გახსნის ფაქტს ადასტურებენ.
22:05
რუსეთისა და ე.წ. დონეცკის სახალხო რესპუბლიკის არმიები მარიუპოლს აღმოსავლეთიდან უტევენ. გააფთრებული შეტაკებები გაიმართა სოფელ შიროკინოსთან, რომელიც ნოვოაზოვსკსა და მარიუპოლს შორის მდებარეობს.
ამის შემდეგ რუსმა სამხედროებმა მარიუპოლის მიმართულებით საარტილერიო დანადგარები წასწიეს და აღმოსავლეთ მისადგომებს უკვე "გრადის" ჭურვებს ესვრიან.
