-
2015-11-29 21:38
სირიის პროვინცია იდლიბში რუსული ავიაციის დაბომბვას 40 მშვიდობიანი მოქალაქე შეეწირა. ბომბები ქალაქ არიხას ბოსტნეულის ბაზარში ჩამოცვივდა.
ამის შესახებ სხვადასხვა წყაროები იტყობინებიან, რომელთა მონაცემები მსხვერპლის შესახებ განსხვავებულია, თუმცა, ყველა თანხმდება იმაში, რომ ბომბები ბაზარში ჩამოცვივდა და მშვიდობიანი მოსახლეობა დაიღუპა.
"ალ-ჯაზირას" ცნობით, მსხვერპლის რიცხვი 40-დან 60-დე მერყეობს, სირიის ადამიანის უფლებათა დაცვის საზედამხედფველო საბჭო კი იტყობინება, რომ 60 ადამიანი დაიღუპა. სირიის ოპოზიციური ტვ "ორიენტი" ავრცელებს ცნობას, რომ დაბომბვამ 40 ადამიანი იმსხვერპლა.
ჰოლანდიური გამოცემის Volkskrant Focus-ის რეპორტიორმა საკირა ხადერამ "ტვიტერზე" გამოაქვეყნა ფოტო და ვიდეო, სადაც სისხლიანი ადგილები, დახოცილი ადამიანები და მტირალი ჭირისუფალი ჩანს. მან დაადასტურა, რომ ავიადარტყმა მოხდა. ამავე დროს, "ალ-ჯაზირა" ამტკიცებს, რომ ავიადარტყმა რუსულმა ავიაციამ განახორციელა და ე.წ. კასეტური ბომბები გამოიყენა, თუმცა, ტელევიზიას არ დაუსახელებია, რას ეყრდნობა ეს დასკვნა.
ტერიტორიას, სადაც დაბომბვა მოხდა, ამ ეტაპზე ასადის ოპოზიციური დაჯგუფების Army of Conquest წევრები აკონტროლებენ. ეს ორგანიზაცია არ შედის "ისლამური სახელმწიფოს" არმიის შემადგენლობაში.