საქართველოს პარლამენტის ვიცე-სპიკერი, „ერთიანი ნაციონალური მოძრაობის“ ერთერთი ლიდერი გიორგი ბარამიძე უკრაინის ატო-ს ზონაში, ბატალიონ „აიდარის“ მიერ დაკავებულ პოზიციებზე, უშუალოდ წინახაზზე იმყოფებოდა.
ბატალიონის მეთაურ სერგეი მელნიჩუკთან ერთად ბარამიძე ლუგანსკის ოლქის დასახლებულ პუნქტებში იმყოფებოდა, სადაც ბრძოლის წინახაზი გადის. აქ ის „აიდარის“ მებრძოლებს, მათ შორის, ქართველ მოხალისეებს შეხვდა.
ქართველმა მოხალისეებმა მას საქართველოს სახელმწიფო დროშა გადასცეს, რომელიც მთელი ბრძოლების განმავლობაში თან ჰქონდათ. მათ ვიცე-სპიკერს სთხოვეს, დროშა საქართველოში წაიღოს და თანამემამულეებს მაიდნის გაუტეხელი სულისა და შემართების სიმბოლოს გადასცეს.
გიორგი ბარამიძემ განაცხადა, რომ შეძრულია სეპარატისტების მხრიდან გახსნილი ცეცხლის დამანგრეველი შედეგებით, მან 2008 წლის რუსეთ-საქართველოს ომი გაიხსენა და პარალელი გაავლო საქართველოში რუსი აგრესორების მიერ დაბომბილი დასახლებული პუნქტების მდგომარეობასთან.
„უკრაინა თავისუფლებისთვის ბრძოლის უკანასკნელი ფორპოსტია“, - აღნიშნა გიორგი ბარამიძემ. – „ის არის საბრძოლო ზღვარი არამარტო უკრაინისთვის, არამედ მთლიანად, აღმოსავლეთ ევროპისთვის. მე გავიცანი დღეს ამ ფორპოსტის მცველები და მე ვამაყობ მათით. მინდა გადავცე მათ ჩემი პირადი და ქართველი ხალხის მადლიერება იმისთვის, რასაც აკეთებენ“.
აღსანიშნავია, რომ ბატალიონ „აიდარის“ მეთაური სერგეი მელნიჩუკი რადის დეპუტატი გახდა, თუმცა, ამის მიუხედავად, არ ტოვებს ბატალიონს და ხშირად გადის წინახაზზე.