2014-09-23 21:16

თვითმკვლელობამდე გორში, კომბინატის დასახლებაში მცხოვრებმა  ნინო ბაბუციძემ სოციალურ ქსელში საკუთარ ფოტოზე შემდეგი შინაარსის მინაწერი დატოვა: „მოვკვდები იმაზე ლამაზად, ვიდრე თქვენ ცხოვრობთ"...

 ჩამომხრჩვალი გოგონა მამამ იპოვა.

„ნინო სიცოცხლით სავსე გოგო იყო, სულ ცეკვავდა, მღეროდა... წლებია ვიცნობ, ბავშვობიდან. გაოგნებული ვარ...

გორში, სუხიშვილების სახელობის უნივერსიტეტში სწავლობდა. ძალიან კარგად ცეკვავდა...“ - ასე იხსენებს გოგონას თავისი მეგობარი.

„ამ ტრაგიკულ ამბამდე რამდენიმე დღით ადრე ვნახე. კარგ ხასიათზე იყო, მხიარული, მომღიმარე. თავის გეგმებსა და დასვენებაზე მელაპარაკა. ძალიან კარგი იუმორი ჰქონდა, სხარტი და ცოცხალი. საერთოდ, გარშემო სიხარულსა და სითბოს აფრქვევდა.

ძალიან ლამაზი იყო და ღიმილი ძალიან უხდებოდა. ერთ სკოლაში ვსწავლობდით და რომ მოდიოდა, ეზოდან იწყებდა სიცილს. რაც უნდა ცუდ ხასიათზე ვყოფილიყავით, მაშინვე გაგახალისებდა... შოკში ვართ ყველანი...

ვერაფერზე ვერ ვფიქრობ. არ ვიცი, რა უნდა მომხდარიყო მის ცხოვრებაში, რომ ეს გაეკეთებინა, რადგან სიცოცხლეზე უსაზღვროდ შეყვარებული იყო...

„ფეისბუქის“ სტატუსი მგონია, რომ უბრალოდ დაემთხვა. ვინც ბოლოს ნახა, ყველამ თქვა, რომ მოწყენილობის კვალიც არ არტყობოდა, თორემ რამე რომ ყოფილიყო, უახლოეს მეგობრებს გაუზიარებდა.

იმათ ვკითხე, ვინც მასთან ჩემზე ახლოს იყო, ისინი ჩემზე უარეს დღეში არიან. მამამისის სახე არასოდეს დამავიწყდება, - ნინის ცხედარს დაჰყურებდა და თავისთვის ამბობდა, - რატომ შვილო, რატომო...

მომხდართან დაკავშირებით, არაერთი ვერსია გავრცელდა... ვითომ შეყვარებულის გამო მიიღო ასეთი გადაწყვეტილება, ტყუილია და დანამდვილებით შემიძლია ამის თქმა. ნინი არ იყო ის ადამიანი, ვინც ამას გააკეთებდა. ზუსტად ვიცი...

ნინოზე, ამას სრულიად გამოვრიცხავ. ყველას მინდა ვთხოვო, ნუ ავრცელებენ საზიზღარ ჭორებს, ამით მის ოჯახსა და ახლობლებს უარეს დღეში გვაგდებენ. არ შეიძლება, მიცვალებულზე შენი ვერსიით ილაპარაკო,“ - განაცხადა ნინის მეგობარმა.

„კვირის პალიტრა“