24 მაისს, ღამის საათებში კომპანია „ინტერტრასმა“ რუსთავში 140 ახალი ყვითელი სამარშრუტო მიკროავტობუსი შეიყვანა. კადრები „თავისუფალმა ზონამ“ გაავრცელა.
ტრანსპორტის შეყვანა ღამის საათებში, სავარაუდოდ, იმის გამო მოხდა, რომ „ძველ მძღოლებს“ პროცესისთვის ხელი არ შეეშალათ. „ინტერტრასის“ თანამშრომლებმა „თავისუფალი ზონის“ რეპორტიორისთვის გადაღებაში ხელის შეშლაც სცადეს.
შეგახსენებთ, რომ რუსთავი-თბილისის რეისის ძველი სამარშრუტო ტაქსების მძღოლები ამ დრომდე აპროტესტებენ „ინტერტრასის“ გამარჯვებას ტენდერში, რომლის მიხედვითაც რუსთავი-თბილისის სამარშრუტო ხაზზე მონოპილისტი სწორედ ეს კომპანია ხდება.
როგორც „ძველი მძღოლების“ ადვოკატმა რევაზ ნიჟარაძემ "ნეტგაზეთს" განუცხადა, „ამ ყველაფრის უკან ვიცე–პრემიერი კახა კალაძე დგას. მისი თქმით, კომპანია "ინტერტრასი", რომელიც მონოპოლისტი ხდება ამ ბაზარზე, დღეისათვის მხოლოდ ქაღალდზე არსებობს, რადგან დოკუმენტაციის მიხედვით არავითარი უძრავ–მოძრავი ქონება არ გააჩნია.
ეს კომპანია კალაძის მეგობარმა ყოფილმა ფეხბურთელებმა, საქართველოს ნაკრების ექსწევრებმა- გიორგი დემეტრაძემ, გიორგი ანჩაბაძემ და ფირუზ ხურცილავამ დააარსეს. შემდეგ კი კვალის აბნევის მიზნით სხვა მოქალაქეზე, გვარად ლომოძეზე გადააფორმეს. ამასთან, ადვოკატის მტკიცებით, "ინტერტრასს" ტენდერში მონაწილეობისათვის საგარანტიო თანხა 1,5 მილიონი ლარი "პროგრეს ბანკმა" გამოუყო“.