ფინანსთა მინისტრი ნოდარ ხადური აცხადებს, რომ მისდამი დაქვემდებარებული სამინისტროს კომპეტენციის ფარგლებს სცილდება ლარის კურსის რყევასთან დაკავშირებული შეკითხვები.
"მე ერთი შემიძლია გითხრათ, ფინანსთა სამინისტროს კომპეტენციის ფარგლებს მე ვერ გავცდები. გაცვლით კურსზე ბიუჯეტის ზეგავლენა არის ნულის ტოლი", - განაცხადა ხადურმა, ხოლო კითხვაზე, იხსნის თუ არა პასუხისმგებლობას ფინასთა მინისტრი ლარის ვარდნის გამო, ხადურმა ჟურნალისტებს ურჩია, კანონმდებლობას გაეცნონ.
ამის გარდა, ხადურმა არ უპასუხა შეკითხვას, სახეზეა თუ არა შეცდომა ეროვნული ბანკის ქმედებებში:
"ფინანსთა მინისტრს არ აქვს კომპეტენცია, შეაფასოს სხვა უწყებების საქმიანობა", - განაცხადა ნოდარ ხადურმა.
შეგახსენებთ, რომ ზემოთქმულის მიუხედავად, ნოდარ ხადური საკუთარ პოზიციას ლარის ვარდნაზე მაინც გამოთქვამს ხოლმე. ასე მაგალითად, „იმედის კვირაში“ მან განაცხადა, რომ მოსახლეობამ ოპტიმიზმი უნდა შეინარჩუნოს, რადგან ლარი ცოცხალი ორგანიზმია და მასზე გავლენას ბევრი რამ ახდენს.
ამასთან, ხადურმა განაცხადა, რომ ვერ გააკეთებს პროგნოზს, როდის დაუბრუნდება ლარის კურსი ძველ ნიშნულს ან დაუბრუნდება თუ არა საერთოდ.
ასევე შეგახსენებთ, რომ დღეს დოლართან მიმართებაში ლარის გაცვლითი კურსი 1.95 შეადგენდა, რაც ლარის გაუფასურების რეკორდული მაჩვენებელია. ყველაზე დაბალი კურსი აქამდე 2004 წელს დაფიქსირდა, როცა ლარი დოლართან მიმართებაში 1.82 ნიშნულზე იდგა.
