2013-12-15 20:56

რეინტეგრაციის მინისტრი პაატა ზაქარეიშვილი შიდა ქართლის ოკუპირებულ ტერიტორიებზე მავთულხლართების გავლების პროცესს „ოკუპაციის ინფრასტრუქტურულ შეფუთვას“ უწოდებს.

მინისტრი აცხადებს, რომ მოსახლეობა ადგილზეა დაცული და „გამყოფი ხაზის გასწვრივ“ ისინიც კი ბრუნდებიან, ვინც იქედან 2008 წლის აგვისტოში გამოვიდნენ.

„დევნილები არ გვყავს და გამყოფი ხაზის გასწვრივ ისინიც კი ბრუნდებიან, ვინც იქედან 2008 წლის აგვისტოში გამოვიდა“, – ეს განცხადება პაატა ზაქარეიშვილმა „კურიერში“, 14 დეკემბერს გააკეთა.

მინისტრის თქმით, მავთულხლართების გავლების პროცესთან ერთად, ოკუპირებულ ტერიტორიებზე წინა პერიოდში სამხედრო ბაზების მშენებლობა და იარაღის შეტანა დაიწყო, მაგრამ ამაზე საუბარი არ ყოფილა: „არც თქვენს ტელევიზიას და არც სხვებს ეგ ამბები არ გაუშუქებიათ“, –აღნიშნა ზაქარეიშვილმა:

"რუსებმა ჯერ დაიპყრეს ტერიტორია, ოკუპაცია მოახდინეს, აღიარეს დამოუკიდებლად, მერე ე.წ. ხელისუფლებასთან დაამყარეს ფორმალური ურთიერთობები, ხელშეკრულებების საფუძველზე და სემდეგ დაიწყეს სამხედრო ბაზების მშენებლობა. არცერთ ტელევიზიას არ გაუშუქებია ბაზების მშენებლობა და იარაღის შეტანა.

სწორიცაა და კარგია, რომ ყოველ ჩარჭობილ ბოძზე, მავთულხლართების გავლებისას ტელევიზიები იქ არიან, მაგრამ ოცამდე შენობაა აშენებული სამხედრო ინფრასტრუქტურის, იარაღია შეტანილი – ამაზე ადრე არ ყოფილა ლაპარაკი.

დღეს ხდება ბოლო ეტაპი ამ ოკუპაციის ინფრასტრუქტურილი შეფუთვისა: მას შემდეგ, რაც ააშენეს ბაზები, ინფრასტრუქტურა, გზები, ისინი ამ ყველაფერს ფუთავენ მავთულხლართებით, რაზეც ჩვენ, რა თქმა უნდა, ვპასუხობთ, მაგრამ ისე არ უნდა ვუპასუხოთ, რომ მივიღოთ 2008 წლის აგვისტო:

ჩვენი ამოცანაა, არ ავყვეთ რუსეთს იმ თამაშში, რაც მათ აწყობთ: აჩვენონ, რომ საქართველო არის ჩამოუყალიბებელი, სპონტანური სახელმწიფო. ჩვენ გვინდა, რომ მოსახლეობა ადგილზე დავიცვათ. მადლობა ღმერთს, რომ ჩვენ მოსახლეობა დაცული გვყავს ადგილზე, დევნილები არა გვყავს... ჩვენ ვეხმარებით მათ და ვმუშაობთ, ამაში ისინი დარწმუნდებიან, რომ იმ რეგიონში, გამყოფი ხაზის გასწვრივ – მოსახლეობა არა თუ არ გამოდის, ისინიც კი ბრუნდებიან, ვინც გამოვიდა 2008 წლის აგვისტოში...“, – განაცხადა პაატა ზაქარეიშვილმა.