2014-08-27 12:11

NDI-ის გამოკითხვების მიხედვით, წინა კვლევასთან შედარებით მნიშვნელოვანი ცვლილებებია საქართველოს პოლიტიკოსთა და საზოგადო პირთა მოწონების რეიტინგებში.

საქართველოს პრეზიდენტის გიორგი მარგველაშვილის მოწონების რეიტინგი ყოფილი პრემიერის ბიძინა ივანიშვილის მოწონების რეიტინგზე მაღალია. კერძოდ, მარგველაშვილი NDI-ის გამოკითხულთა 48%-ს მოსწონს, ხოლო ივანიშვილი - 45%-ს.

ამის გარდა, აპრილთან შედარებით, 2%-ით გაიზარდა საქართველოს პრეზიდენტის მოწონების რეიტინგი, ხოლო ყოფილი პრემიერი 6%-ით ნაკლებს მოსწონს. მაშინ, კვლევაში მონაწილეთა 46%-ს მოსწონდა გიორგი მარგველაშვილი, ხოლო 51%-ს ივანიშვილი.

ამასთან, პრეზიდენტისადმი ნეგატიური დამოკიდებულება შემცირებულია. კერძოდ, აპრილში საქართველოს პრეზიდენტი 26%-ს არ მოსწონდა, ახლა - 19%-ს არ მოსწონს. რაც შეეხება ივანიშვილს, მისი არმოწონების რეიტინგი აპრილშიც და აგვისტოშიც 24%-ია.

საქართველოს პრემიერის ირაკლი ღარიბაშვილის მოწონების რეიტინგი 10%-ით შემცირდა და 54%-ს შეადგენს. NDI-ის გამოკითხულებს პრემიერზე მეტად კვლავაც თავდაცვის მინისტრი ირაკლი ალასანია მოსწონთ. კერძოდ, ალასანიას მოწონების რეიტინგი 60%-ია. აპრილში თავდაცვის მინისტრი 67%-ს მოსწონდა.

ვიცეპრემიერ კახა კალაძის მოწონების რეიტინგი 7%-ით შემცირდა და 44% აქვს. ასევე 44%-ს მოსწონს იუსტიციის მინისტრი თეა წულუკიანი.

პოლიციის საქმიანობის მოწონებამ 11%-ით დაიკლო. 2014 წლის აგვისტოს კვლევის მიხედვით, პოლიციის საქმიანობას 40% დადებითად აფასებს. 45% საშუალოდ, ხოლო 6% უკმაყოფილი ან ძალიან უკმაყოფილოა მისი მუშაობით.

აპრილში, ანალოგიურ კვლევაში პოლიციის საქმიანობას 51% კარგად ან ძალიან კარგად აფასებდა. 37% საშუალოდ, ხოლო 6% მისი საქმიანობით უკმაყოფილო იყო.