-
2014-08-26 14:10
როგორც საგარეო საქმეთა მინისტრმა მაია ფანჯიკიძემ განაცხადა, თურქეთის პრეზიდენტის ინაუგურაციაზე ირაკლი ღარიბაშვილი გაემგზავრება, რადგან პრემიერ-მინისტრის რანგში მას თურქეთში ვიზიტი არ ჰქონია.
„ჩვენ ამის თაობაზე გვქონდა კომუნიკაცია თურქეთის მხარესთან. პირველად ხდება, რომ თურქეთის პრეზიდენტის ინაუგურაცია ტარდება, პირდაპირი წესით პრეზიდენტი პირველად აირჩიეს და ალბათ, ამიტომ გადაწყვეტეს უფრო საზეიმო ვითარებაში ინაუგურაცია.
იმის გამო, რომ საქართველოს და თურქეთის პრეზიდენტების ვიზიტების გაცვლა უკვე მოხდა, მოგეხსენებათ, გიორგი მარგველაშვილი თურქეთში უკვე იმყოფებოდა და აბდულა გიული საქართველოში უკვე იყო, ახლა პრემიერი მიემგზავრება.
მოლოდინიც თურქეთის მხრიდან იყო, რომ პრემიერი ჩავიდოდა, რადგან ის ამ პერიოდში თურქეთში არ ყოფილა. რადგანაც იგი არის საქართველოს პრემიერ-მინისტრი, ამიტომაც ის მიემგზავრება თურქეთში.
არაფერი ამაში განსაკუთრებული არ არის. საქართველოს პრემიერისთვის ეს არის პირველი ოფიციალური ვიზიტი თურქეთში”, - განაცხადა მაია ფანჯიკიძემ.