2014-08-25 13:10

რუხში რეგიონული მნიშვნელობის საავადმყოფო აშენდება. - ამის შესახებ პრემიერ-მინისტრმა ირაკლი ღარიბაშვილმა განაცხადა.

"რუხში ვიწყებთ რეგიონული მნიშვნელობის საავადმყოფოს მშენებლობას. ამის იდეა ეკუთვნის ბატონ ბიძინა ივანიშვილს. მისი ინიციატივით თანამედროვე ტექნიკით და საერთაშორისო სტანდარტებით აღჭირვილი კლინიკა აშენდება, რომელიც 220 საწოლზეა გათვლილი. ეს იქნება მრავალპროფილური კლინიკა. მშენებლობის ვადაც განვსაზღვრეთ და ის 2 წელიწადში უნდა დასრულდეს. საავადმყოფოს ძირითად კორპუსებთან ერთად აშენდება სასტუმროს ტიპის საერთო საცხოვრებელიც", – განაცხადა ღარიბაშვილმა. 

მისი თქმით, პროექტის ღირებულება 40 მილიონ ლარს შეადგენს.ირაკლი ღარიბაშვილის განცხადებით, შეიქმნება ახალი სამუშაო ადგილებიც, სადაც ადგილობრივი მუშახელი დასაქმდება. 

"ეს საავადმყოფო სერიოზულად გააუმჯობესებს სამეგრელოში და მიმდებარე რეგიონებში სამედიცინო მომსახურების ხარისხს. ასევე მნიშვნელოვანია ის, რომ ერთმანეთთან დააკავშირებს ენგურის ორივე მხარეს, ჩვენი აფხაზი ძმები შეძლებენ აქ მკურნალობას", - აღნიშნა პრემიერ-მინისტრმა. 

600 ადამიანი დასაქმდება. არჩევნების წინ შევხვდი მოსახლეობას, რომლებიც წლების განმავლობაში დაგროვებული პრობლემების შესახებ მესაუბრნენ. მათ დავპირდი, რომ ეტაპობრივად შევუდგებოდით პრობლემების მოგვარებას. ჩვენი ხელისუფლების საზრუნავი არის ადამიანი, მისი სოციალური პირობების გაუმჯობესება. დღეს საქართველოში თითოეული მოქალაქე არის დაზღვეული და ამ ხარჯებს ფარავს სახელმწიფო. მინდა აღვნიშნო, რომ ჩვენ დაპირებისამებრ ვაშენებთ ამბულატორიებს საქართველოს ყველა რაიონში, რათა ყველასთვის ხელმისაწვდომი იყოს ჯანდაცვა. მე პირადად მივადევნებ თვალყურს მშენებლობის პროცესს, რომ მაქსიმალურად სწრაფად იქნას აშენებული", - აღნიშნა ღარიბაშვილმა.