-
2014-08-08 12:08
პრემიერ-მინისტრი ბოლო პერიოდში ევროპელი პოლიტიკოსების განცხადებებს გამოეხმაურა, რომლითაც ისინი სააკაშვილის პასუხისგებაში მიცემის გამო შეშფოთებულნი არიან.
ირაკლი ღარიბაშვილის განცხადებით, ისინი მეგობრული ვალდებულებიდან გამომდინარე სააკაშვილის მიმართ უბრალოდ თანაგრძნობას გამოხატავენ.
ღარიბაშვილმა ასევე აღნიშნა, რომ ამ ადამიანებმა არ იცოდნენ, თუ რა ხდებობა ბოლო წლების განმავლობაში საქართველოში.
“მინდა საზოგადოებას განვუმარტო, რომ ეს სააკაშვილის გარკვეული მეგობართა კლუბია, რომლებსაც აქვთ მეგობრული ველდებულებები და ისინი უბრალოდ თანაგრძნობას გამოხატავენ. ეს მარტივად ასეა.
სამწუხაროდ, მათ არ იცოდნენ ის საშინელებები, რაც საქართველოში წლების განმავლობაში ხდებოდა. ნებისმიერი მოქალაქისთვის შემზარავი იყო იმ ფაქტების და კადრების ნახვა, რომელიც 2008 წლის ომის დროს ვიხილეთ. გაქცეული მთავარსარდალი. ამას მომავალი თაობა კიდევ უფრო კარგად და მკაცრად შეაფასებს.
ჩვენი მთავრობის და სახელმწიფოს მთავარი პრიორიტეტია გამჭვირვალობა და რეალური დემოკრატიის, კანონის უზენაესობის დამკვიდრება.
ნებისმიერი საუბრები, რაც მათ შორის ჩვენი მეგობრებისგან გვესმის იმის თაობაზე, რომ ჩვენ არ უნდა გამოვიძიოთ წარსულში ჩადენილი დანაშაულები, ეს პირდაპირ ეწინააღმდეგება კანონის უზენაესობის საერთაშორისოდ აღიარებულ პრინციპებს და ჩვენი მთავრობის მთავარ ღირებულებებს.
ჩვენ თუ გვსურს რეალურად დემოკრატია შევქმნათ ამ ქვეყანაში, მაშინ კანონზე მაღლა არავინ უნდა იდგეს. ეს ჩვენი და ჩვენი ხალხის არჩევანია, რომ ყველა თანაბარი იყოს და ასეც იქნება, სანამ ჩვენ ხელისუფლებაში ვიქნებით”, - განაცხადა ირაკლი ღარიბაშვილმა.