კავკასიის საკითხებში ექსპერტის მამუკა არეშიძის აზრით, კავკასიაში, სომხეთ-აზერბაიჯანს შორის ფართო მასშტაბიანი ომის შემთხვევაში საქართველო აუცილებლად ჩართული იქნება.
„აზერბაიჯანული არმია შეიარაღების თვალსაზრისით ერთ-ერთი საუკეთესოა მსოფლიოში, ამიტომაც იქნება ფართომასშტაბიანი ომი. თუ ჩვენ გავიხსენეთ ძველ პერიოდს, მაშინაც იყო ჩათრეული საქართველო ამ ომში", - აცხადებს არეშიძე.
მისივე განცხადებით, ქვეყანას ლტოლვილების მიღება ორივე მხრიდან მოუწევს.
„ასევე ვერ გამოვრიცხავთ იმას, რომ ორივე მხარემ საქართველოს ტერიტორიაზე მოინდომოს დივერსიული აქტების ჩატარება.
აზერბაიჯანელებმა სომხეთში მიმავალი გაზსადენის წინააღმდეგ და სომხებმა იმ ენერგომატარებლის კორიდორის წინააღმდეგ, რომელიც აზერბაიჯანიდან საქართველოს ტერიტორიაზე გადის. საერთოდ, სხვა ტიპის აქტივობებიც შესაძლებელია.
ნუ დაგვავიწყდება, რომ ჩვენთან არის რეგიონები, სადაც ცხოვრობენ აზერბაიჯანელებიც და სომხებიც, ამიტომაც ლოკალური კონფლიქტებიც შესაძლებელია. რაც ყველაზე მნიშვნელოვანია, რეგიონის ეკონომიკურ აქტივობას, ამ ომის შემთხვევაში წერტილი დაესმება.
საქართველო ირიბად თუ პირდაპირ კონფლიქტში ჩართული იქნება, ხელისუფლებას გაუჭირდება რამის გაკეთება. ერთადერთი შუამავლის როლის შესრულებაა შესაძლებელი. ჩვენ მთავარია დავადგინოთ ვის აწყობდა ამ კონფლიქტის ესკალაცია, რაც რამდენიმე დღეში დადგინდება", - აცხადებს არეშიძე.
http://primetimenews.ge/