2014-08-02 21:11

თბილისის მერის განცხადებით, „ნაციონალურ მოძრაობას“ არ აქვს არანაირი უფლება მიუთითოს თბილისის მერიის თანამშრომლებს, დატოვონ თუ არა თანამდებობები.

„ჩვენ მზად ვართ, ვითანამშრომლოთ ნებისმიერ ადამიანთან, თანამშრომელთან რომელიც იცნობს ჩვენს პროგრამას და მზად არის ჩვენთან ერთად 24-საათიანი მუშაობისთვის, კარგად აქვს გააზრებული პასუხისმგებლობა და პროფესიონალია“, - განაცხადა ნარმანიამ. 

რაც შეეხება საკადრო გადაადგილებებს, ნარმანიას თქმით, პარლამენტმა  ადგილობრივ თვითმმართველობებში ატესტაციის წესი სულ ახალახან მიიღო.

„დავემორჩილებით ამ წესს და შესაბამისად ვიმოქმედებთ. ჩვენ მივიღეთ გადაწყვეტილება, რომ ერთ-ერთი დიდი სამსახური სოციალური მომსახურებისა და კულტურის სამსახური გაიყოს რამდენიმე საქალაქო სამსახურად.

აქედან გამომდინარე, მომდევნო კვირას მას შემდეგ, რაც დამტკიცდება თბილისის მთავრობის შემადგენლობა, ამ სამსახურის გაყოფასთან დაკავშირებით წინადადებები და კანდიდატურები საკრებულოს მომდევნო კვირას წარედგინება”, - განაცხადა ნარმანიამ. 

შეგახსენებთ, რომ ირმა ნადირაშვილმა მერიის თანამშრომლებს მოუწოდა, სამსახურიდან წასვლის შესახებ განცხადებები არ დაწერონ.