-
2017-09-15 19:15
"მე მიმძიმს თქვენი მოსმენა, უბრალოდ, იძულკებული ვარ გისმინოთ, რადგან თქვენ ამართლებთ მათ, ვინც დაგიხოცათ ნათესავები, თუკი თქვენ გყავთ ნათესავები საერთოდ საქართველოში", -
ტვ "იბერიის" წამყვანმა არჩილ გამზარდიამ ასე მიმართა "რუსეთ-საქართველოს ახალგაზრდული კავშირის" წარმომადგენელს საქართველოში ირაკლი ყიფიანს, რომელიც ამტკიცებდა, რომ რუსეთსა და საქართველოს შორის ურთიერთობა მხოლოდ მას შემდეგ დალაგდება, რაც "საქართველო უარს იტყვის ნატოზე და ნებისმიერ სამხედრო გაერთიანებაზე".
"სად იყვნენ ნატოს ტანკები საქართველოში 1991 წელს თუნდაც, როცა დაიწყო ქართველების დახოცვა: მე წამებით დამიხოცეს ბიძაშვილები, ბიძა, რომლის საფლავიც არ გვინახავს და რომელიც მხოლოდ საკუთარ სახლს იცავდა, გამოდევნეს ათასობით ადამიანი..." - აღნიშნა არჩილ გამზარდიამ.
"ჩემი პროვოცირებული იყო აფხაზეთის კონფლიქტი?" - უპასუხა მას ირაკლი ყიფიანმა.
"არა, თქვენ იცავთ იმ მხარეს, რომელმაც დაგიხოცათ ნათესავები, თუ გყავთ საერთოდ ნათესავები საქართველოში", - უპასუხა გამზარდიამ, რასაც ისევ ირაკლი ყიფიანის რეპლიკა მოჰყვა:
"რაც შეეხება 1991 წელს, იქ იმდენი ნიუანსია, ვინ ვინ და ხოცა და როგორ, ეს კიდევ ცალკე თემაა. თუ ჩვენ რუსეთ-საქართველოს ისტორიის დეტალებზე უნდა ვისაუბროთ, ამისთვის ცალკე მოვალ", - განაცხადა ირაკლი ყიფიანმა.
არჩილ გამზარდიამ, როგორც წამყვანმა, შენიშვნა სხვა სტუმრისგან - იური მეჩითოვისგანაც მიიღო: "თქვენ ხართ წამყვანი და თქვენ უნდა იყოთ მედიატორი ამ შემთხვევაში..."
"არა, მე ჯერ ამ ქვეყნის მოქალაქე ვარ და მერე მაქვს პროფესია", - განაცხადა არჩილ გამზარდიამ შენიშვნის პასუხად.