2013-07-17 12:18

ის პოლიციელი, რომელმაც 2012 წლის ნოემბერში, შსს-ს გენინსპექციის უფროსის თენგიზ გუნავას დაკავებაში მონაწილეობდა და ოქმი შეადგინა, დააწინაურეს.

ინფორმაციას ამის შესახებ დეპუტატი, საპარლამენტო უმცირესობის წევრი მარიამ საჯაია ავრცელებს. მისი ინფორმაციით, მირიან თოფურია, რომელმაც უშუალოდ შეადგინა თენგიზ გუნავას დაკავების ოქმი, დღეს კახეთის პოლიციის უფროსის მოადგილეა.

შეგახსენებთ, რომ შსს-მ 2012 წელს, თენგიზ გუნავას დაკავებისას პროცედურული ნორმების დარღვევის გამო (ადვოკატები და თავად თენგიზ გუნავა დღემდე ამტკიცებენ, რომ დაკავებისას გენინსპექციის უფროსს იარაღი და ნარკოტიკები ჩაუდეს) და ცრუ ბრალდებით დაკავებისთვის, შსს-ს ოფიციალური ცნობით, სამსახურიდან გათავისუფლდნენ პოლიციელები: თევდორე შონია, ნიკოლოზ არდანაშვილი, ნიკოლოზ შატაკიშვილი, გიორგი ბლიაძე, გიორგი შარაშენიძე და გიორგი კიკალიშვილი.

მირიან თოფურიას გვარი გათავისუფლებულთა შორის არ ფიგურირებს იმის მიუხედავად, რომ მან უშუალოდ შეადგინა და ხელი მოაწერა თენგიზ გუნავას დაკავების ოქმს.