"ლაიფნიუსი" იტყობინება, რომ საქართველო-დაღესტნის საზღვართან, სადაც ერთერთ საცხოვრებელ სახლს თავს აფარებენ ბოევიკები, რუსეთმა სპეცრაზმის რამდენიმე შენაერთი გადაისროლა.
გამოცემის ინფორმაციით, ორმა ბოევიკმა, რომლებმაც წინადღეს რუსი პოლიციელები მოკლეს, სოფელ ჩაროვალის მიდამოებს შეაფარეს თავი და ამ წუთებში ისინი ალყაში არიან მოქცეული.
არაა გამორიცხული, დევნილმა ბოევიკებმა თავი საქართველოს ტერიტორიას შეაფარონ. როგორ განვითარდება მოვლენები ამის შემდეგ, უცნობია.
რუს პოლიციელებზე თავდასხმის შემდეგ გაქცეული ბოევიკების ძებნის ოპერაციაში რაიონში დისლოცირებული ყველა ძალა იყო ჩართული, მათ ეძებდნენ ავიაციის დახმარებითაც. ძებნის პროცესში ჩართული იყვნენ შსს-ს ძალები და სპეცდანაყოფები. ცოტა ხნის წინ გამოცხადდა, რომ ბოევიკებს სოფელ ლაკის რაიონში, სოფელ ჩაროვალთან მიაგნეს.
შსს-ს პრესსამსახური ფლობს ინფორმაციას დაღესტანში მიმდინარე მოვლენების შესახებ, მაგრამ არ ვარაუდობს, რომ შესაძლოა, დაპირისპირება საქართველოს ტერიტორიაზე გაგრძელდეს:
"ჩვენს მხარეს არაფერი ხდება", - მოკლე კომენტარით შემოიფარგლა "ნიუპოსტთან" ნინო გიორგობიანი.