2013-07-12 13:38

„ნაციონალური მოძრაობის“ ერთერთმა ლიდერმა, საპარლამენტო უმცირესობის წევრმა გიორგი ვაშაძემ „უპრეცენდენტო გადაწყვეტილება“ უწოდა სასამართლოს მიერ მიღებულ გადაწყვეტილებას მისი საცხოვრებელი სახლის დაყადაღების შესახებ და აღნიშნა, რომ სასამართლო პრაქტიკა მსგავს შემთხვევას არ იცნობს. 

ამის შესახებ დეპუტატმა საგანგებო ბრიფინგზე განაცხადა, შეეხო რა ჯოზეფ ქეის მოთხოვნით სასამაღთლოს მიერ მიღებულ გადაწყვეტილებას მისი საცხოვრებელი სახლის დაყადაღების შესახებ:

„სამწუხაროდ, გუშინ სასამართლომ მიიღო აბსოლუტურად უპრეცენდენტო გადაწყვეტილება, დაყადაღებულია ჩემი სახლი, იმ აზრის გამოხატვისთვის, რაც მე ვთქვი ჯოზეფ ქეისთან დაკავშირებით, პირველი და ყველაზე მნიშვნელოვანი: დღემდე სასამართლო პრაქტიკა არ იცნობს მსგავს გადაწყვეტილებას და პირველი შემთხვევაა, როცა სარჩელის უზრუნველსაყოფად მოხდა კერძო საკუთრების დაყადაღება, ამ შემთხვევაში ჩემი სახლის დაყადაღება.

რაც შეეხება მეორე მნიშვნელოვან საკითხს, სამწუხაროა, რომ ხელისუფლებისთვის ჯოზეფ ქეი გახდა მართლაც როგორც მოწმე, რომელსაც ის იყენებს სხვადასხვა საქმეებთან მიმართებაში და როგორც ჩანს ცდილობენ ახლა ჩემთან მიმართებაში გამოიყენონ ჯოზეფ ქეი, როგორც სარჩელის მხარე, რაც შეეხება ჩემს პოზიციას, მე გამოვხატე სუბიექტური აზრი და ჯოზეფ ქეის ვუწოდე თაღლითი, რადგან ვფიქრობ,რომ ეს არის ჩემი სუბიექტური აზრი და მე ამის სრული უფლება მაქვს.

სიტყვის თავისუფლების შესახებ კანონის შესაბამისად. ჯოზეფ ქეი არის საჯარო ფიგურა და მე მაქვს სუბიექტური აზრის გამოხატვის უფლება. მე აუცილებლად გავასაჩივრებ ამ გადაწყვეტილებას და იმედი მაქვს, რომ სასამართლო მიიღებს ლოგიკურ გადაწყვეტილებას“, - განაცხადა გიორგი ვაშაძემ.