ცოტახნის წინ, მომღერალი მერაბ სეფაშვილი ჯანმრთელობის მდგომარეობის გაუარესების გამო საავადმყოფოში იწვა. მომღერალს ფილტვების ანთება ჰქონდა.
ჟურნალ "თბილისელებთან" ინტერვიუში მერაბ სეფაშვილმა ჯანმრთელობასთან დაკავშირებული ეს რთული პერიოდი გაიხსენა და ასევე, საზოგადოებისგან გამოხატულ მისადმი დიდ სიყვარულს გაუსვა ხაზი.
"ქუჩაში რომ გავდივარ, ვგრძნობ, რომ ჩემი კარგად დანახვა უხარიათ. ვიცოდი, რომ ჩემი ცუდად ყოფნით ყველა შეწუხებული იყო. ახლა ხალხი რომ მხვდება, ყველას აინტერესებს, როგორ ვარ. საბედნიეროდ, უკეთ ვარ, ბევრად უკეთ. მაგრამ ჯერჯერობით მკურნალობას მაინც ვაგრძელებ, იმიტომ რომ სერიოზული ანთება მქონდა ორივე ფილტვში. მდგომარეობა საკმაოდ რთული იყო, მაგრამ მადლობა ღმერთს, გავუმკლავდით.
ამას წინათ სოციალურ ქსელში დავწერე კიდეც, რომ გიყვარდით ვიცოდი, მაგრამ ასე ძალიან თუ გიყვარდით, ეგ არ ვიცოდი-მეთქი (იცინის). ყველას დიდი მადლობა, ვინც მგულშემატკივრობდა. ვინც ჩემი ამბავი განიცადა და გულთან ახლოს მიიტანა. ძალიან ბევრი აღმოჩნდა ასეთი. როგორც საუბრის დასაწყისში გითხარით, ამას ყველგან ვგრძნობ. ქუჩაში ხალხი მანქანებიდან ხელს მიქნევს, მესალმებიან. მათი ჟესტიკულაციით ვხვდები, რომ უხარიათ ჩემი კარგად ყოფნა. უდიდესი სიყვარული და მადლობა ყველას – ჩემგან! ჩემი და ჩემი ხალხის სიყვარული კიდევ სხვა ფენომენია. ამას როგორც ხელოვანი, ისე ვამბობ. მე და ხალხი ერთად ვართ იმ საქმის გამკეთებელი, რასაც ვაკეთებ და ეს ჩემთვის ყველაზე მნიშვნელოვანია."
