-
2014-03-13 21:59
„თავისუფლებისა და მხარდაჭერის ცენტრის“ დამფუძნებელმა, ბაჩო ახალაიას მეუღლემ ანი ნადარეიშვილმა კუდ-ის ყოფილი უფროსის ლევან ქარდავას სახლში ჩრეკის ჩატარების პროცესის შესახებ ისაუბრა და დარღვევებზე მიუთითა.
ანი ნადარეიშვილი აცხადებს, რომ სამართალდამცველები არ დაელოდნენ ადვოკატის მოსვლას, რადგან ჩხრეკა გადაუდებელი იყო:
„ჩხრეკა ჩატარდა ადვოკატის გარეშე, რადგან ადვოკატს არ ჰქონდა მოსვლის დრო, ჩხრეკა კი რატომღაც იყო გადაუდებელი. მეუღლეს ჰქონდა უფლება მოეწვია ოჯახის ახლობელი ჩხრეკაზე დასასწრებად და მან ეს გააკეთა. მოწვეულთა შორის ვიყავი მეც.
გამომძიებელი ხშირად რეკავდა, ამის შემდეგ პოლიციელები შემოვიდნენ და ჩვენ გამოგვიშვეს გარეთ ისე, რომ ჩხრეკა ჯერაც არ იყო დაწყებული. ამასთან, სამართალდამცველები კარის შემტვრევას აპირებდნენ, უკვე გამოძახებული ჰყავდათ მაშველები, მაგრამ ჩვენ კარი თვითონ გავუღეთ.
ჩხრეკას ესწრებოდნენ ოჯახის წევრებიდან ლევან ქარდავას მეუღლე, ასევე სახლში იყო სამი მცირეწლოვანი ბავშვი. მე არ ვიცი, რას დაუპირისპირებს დაცვის მხარე პროკურატურის ბრალდებებს ბაჩო ახალაიასა და ლევან ქარდავას მიმართ, თუმცა, ჩვენ ბევრი მსგავსი ლეგენდა გვსმენია ბაჩო ახალაიას მიმართაც, რომ თითქოს ის ჭამდა ბავშვებს, ხარშავდა და ასე შემდეგ, მაგრამ ეს ლეგენდები რჩებოდა ლეგენდებად, როცა საქმე მიდიოდა სასამართლომდე.
აქვე მინდა შეგახსენოთ, რომ ხვალ უნდა გამოცხადებულიყო განაჩენი დათა ახალაიას საქმეზე, ხოლო ასეთ დროს, როგორც პროკურატურას სჩვევია, ისინი ზრუნავენ ახალი ბრალის წარდგენაზე“, - განაცხადა „კურიერში“ ანი ნადარეიშვილმა.