2013-06-26 20:05

გაზეთ „ასავალ-დასავალში“ დაიბეჭდა ინტერვიუ რეჟისორ ზაზა სვანაძესთან, სადაც რესპოდენტი ყოველგვარ საფუძველს მოკლებულ ბრალდებებს უყენებს სამაუწყებლო კომპანიას და ამასთან, ფაქტობრივად, მსმენელის მოტყუებაში ადანაშაულებს.

კერძოდ, ზაზა სვანაძე გაურკვეველ წყაროებზე დაყრდნობით (ის არათუ არ ასახელებს, არც მიანიშნებს ამ წყაროების წარმომავლობას და სანდოობას) აცხადებს, რომ "აფხაზეთის ხმა" ატერორებდა ბიზნესმენებს, მერაბიშვილის სახელით ყოველდღიურად "აწერდა" რეკლამას და ავალდებულებდა 2 ათასი ლარის მიტანას", რაც ყოვლად წარმოუდგენელი ცილისწამება და ჭორია.

რადიო „აფხაზეთის ხმა“ აცხადებს, რომ არასდროს დაურღვევია კანონი „მაუწყებლობის შესახებ“ და, მით უმეტეს, არც ადმინისტრაციას, არც ქვედა რგოლის სამსახურებს არასდროს მიუმართავთ რეკლამის მოპოვების არაკანონიერი გზებისთვის, რაც კარგად ჩანს შესაბამის დოკუმენტაციებში.

ამავე დროს, გაუგებარია, რა მოტივით უნდა დაფარულიყო „აფხაზეთის ხმის“ მსგავსი „რეკეტი“ ამ დრომდე, მაშინ როცა ბიზნესმენებს და კომპანიებს მრავალი დასაბუთებული თუ დაუსაბუთებელი ბრალდებები გამოუთქვამთ ამ კუთხით და მათ შორის არ ყოფილა დასახელებული „აფხაზეთის ხმა“.

ამავე ინტერვიუში ბატონი ზაზა სვანაძე აცხადებს, რომ „ნაციონალური მოძრაობის“ გენერალური მდივნის ვანო მერაბიშვილის მეუღლე რადიოს შტატგარეშე წამყვანი იყო და ასევე აღნიშნავს, რომ თითქოს ქალბატონ თამარ მერაბიშვილს ღამის საათებში ფსევდონიმით მიჰყავდა გადაცემა, რაც არ შეეფერება სინამდვილეს.

რაც შეეხება სიმღერას "არ მოუყვე არავის", ის მართლაც ტრიალებდა რადიო „აფხაზეთის ხმის“ ეთერში გიო ხუციშვილისა და თაკოს შესრულებით. ამასთან, რადიო „აფხაზეთის ხმა“ ითვალისწინებს სიმღერის ერთ-ერთი შემსრულებლის სურვილს იმის თაობაზე, რომ მან თავის დროზე მხოლოდ სახელის მითითება ისურვა. აქედან გამომდინარე, რადიო „აფხაზეთის ხმა“ ვერც ამ ეტაპზე გასცემს ინფორმაციას იმის თაობაზე, თუ ვინ იყო სიმღერის მეორე შემსრულებელი.

რაც შეეხება თავად სიმღერას, რადიოს ეთერში მისი ხშირად გამეორების მიზეზი ის გახლდათ, რომ სინგლი დიდი მოწონებით სარგებლობდა მასმენელებში. მსგავს პრაქტიკას მიმართავს ყველა რადიომაუწყებელი როგორც საქართველოში, ასევე მის ფარგლებს გარეთ.

რადიო "აფხაზეთის ხმის" ადმინისტრაცია