-
2020-10-28 17:03
კორონავირუსის პანდემიის დროს ხშირად ვფიქრობთ, თუ რის გაკეთება შეიძლება ვირუსის თავიდან ასაცილებლად.
სოციალურ ქსელებში კი ამ დროს უამრავი არასწორი ინფორმაცია ვრცელდება იმაზე, თუ რა ვჭამოთ, რა დავლიოთ და როგორ დავიცვათ თავი კორონავირუსისგან. ხშირად, დეზინფორმაცია იმდენად არასწორია, რომ მას არაერთი ადამიანის სიცოცხლეც კი შეეწირა.
კორონავირუსისგან თავის დასაცავად სოციალურ დისტანცირებასა და პერსონალურ ჰიგიენაზე ეფექტური მეთოდი არ არსებობს. არ არსებობს აბი, სითხე, ან მალამო, რომელიც კოვიდ-19-სგან დაგვიცავს. არ არსებობს კონკრეტული მედიკამენტი, ვიტამინი ან დიეტური დანამატი, რომელიც კორონავირუსისგან დაგვიცავს.
თუმცა, თითოეულ ჩვენგანს შეუძლია საკუთარ იმუნურ სისტემას ოპტიმალურად მუშაობაში დაეხმაროს. ზოგიერთი რამ, რის გაკეთებაც დამატებითი ხარჯების გარეშე მარტივად შეიძლება, არის ხელების სწორი დაბანა, ჯანსაღი კვება, ფიზიკური აქტიურობა, სტრესის შემცირება და კარგი ძილი (მინიმუმ 8 საათი).
ექსპერტები იმუნური სისტემის დახმარებას ორი ძირითადი გზით გვირჩევენ. ერთი არის საკვები, მეორე კი სტრესის მართვა, ვარჯიში და საკამარისი ძილი.
ამერიკის ჯანდაცვის ეროვნული ინსტიტუტის ინფორმაციით, ჯანმრთელობის შენარჩუნების მიზნით ერთ-ერთი საუკეთესო გზა ჯანსაღი კვებაა. ადამიანის იმუნური სისტემა დამოკიდებულია იმაზე, თუ რამდენად იღებს ის ყველა საჭირო მინერალს, ვიტამინის და ანტიოქსიდანტს. იმუნური სისტემის ოპტიმალური მუშაობისთვის, რაც ზოგიერთი ვირუსული ან ბაქტერიული დაავადებისგან გვიცავს ან დაავადების სიმწვავეს ამცირებს, რეკომენდებულია ხილისა და ბოსტნეულის სისტემატური მიღება.
ასე რომ, სანამ დადასტურებულად ბოლომდე გავიგებთ იმას, თუ რა არის კორონავირუსი, რა სიმპტომები აქვს კორონავირუსს, რა გართულებები შეიძლება მოჰყვეს კოვიდ-19-ს და ასე შემდეგ, მარტივად შეგვიძლია იმუნიტეტის გაძლიერება და საკუთარი ორგანიზმისთვის ვირუსთან ბრძოლაში დახმარების გაწევა.