-
2013-06-22 10:48
თავდაცვისა და შინაგან საქმეთა ყოფილი მინისტრი ბაჩო ახალაია ახალ მიმართვას ავრცელებს და ამბობს, რომ ძალადობისა და წამების ფაქტების უკან კონკრეტული ადამიანები დგანან და ასეთი დანაშაულის წარმოჩენა სისტემურ მოვლენად პოლიტიკური სპეკულაციაა.
ამავე დროს, ბაჩო ახალაია მოითხოვს, რომ სასწრაფოდ გამოვლინდნენ და დაისაჯონ პირები, რომლებიც მსგავსი ქმედებების უკან დგანან. განცხადებაში ნათქვამია:
“ვარდების რევოლუციის შემდეგ საქართველოში ძალიან ბევრი მიმართულებით წარმატებით განხორციელდა მნიშვნელოვანი და სასიცოცხლო რეფორმები. სამწუხაროად აღმოჩნდა, რომ ამ ხნის განმავლობაში კონკრეტული ადამიანები, პირადი ინტერესებიდან გამომდინარე სჩადიოდნენ ამა თუ იმ დანაშაულს რითაც ქვეყანას მიაყენეს უდიდესი ზიანი. უდავოა, რომ წამების ფაქტების გამოძიება პრიორიტეტული უნდა იყოს და დამნაშავეებმა პასუხი უნდა აგონ კანონის მთელი სიმკაცრით, განურჩევლად იმისა თუ რომელი ხელისუფლების პირობებში იქნება ეს დანაშაული ჩადენილი – მოქმედი თუ წინა ხელისუფლებების დროს. სამწუხაროდ, ბედუკაძის და მისი თანამოაზრეების პროკურატურის მხრიდან პასუხისმგებლობისაგან განთავისუფლება ბევრ კითხვის ნიშანს ტოვებს.
აქვე მინდა ავღნიშნო, რომ თითოეული დანაშაულის უკან დგანან კონკრეტული პირები და ამ დანაშაულის განზოგადება და სისტემურად წარმოჩენა არის გაუმართლებელი და მიუღებელი. ამაზე საუბარი პოლიტიკური სპეკულაციაა და ეჭვქვეშ აყენებს გამოძიების მიუკერძოებლობას. ასეთი მიდგომა შეურაცხყოფს ათი ათასობით ღირსეულ საჯარო მოხელეს, რომელიც კეთილსინდისიერად ემსახურებოდა და ემსახურება საქართველოს”,- აღნიშნულია ახალაიას განცხადებაში, რომელიც მისი “ფეისბუქის” გვერდზე გამოქვეყნდა.